ZALEN, Nov. 30, 2024: Telengana-a 14th Hockey India Sub-Junior Women National Championship 2024 khelh mekah Mizo tleirawlte chuan Arunachal Pradesh an sawp hnuah Inrinni tuk khan 4-1-in Chandigarh an hneh leh.

Secunderabad-a South Central Railways Sports Complex-a Group E inkhelah hian Mizoram captain Laltlanchhungi’n goal hmahruai vaw lutin Chandigarh tan Tamanna chuan minute hnih hnuah sut mah se Vanlalrinhlui, Laldinpuii leh Manglawmsang ten an chhang let lehnghal a. A zawnin Mizo tleirawlten hnehna an chang.

Mizoram hian Zirtawpni khan AP chu 11-0 zetin an lo sawp tawh bawk a. Hetah hian captain Tlanchhungi chu langsar taka khelin goal li lai a vaw lut a. Chandigarh laka vaw luttu dang, Rinhlui leh Manglawmsang ten an vuak luh bakah C Lalruatsiami, Lalthakimi leh Laldinpuii ten goal an thawh bawk.

14th Hockey India Sub-Junior Women National Championship-ah hian state 28 telin pool riatah then an ni a, Thawhlehni atanga khelh tan kha a ni.

Mizoram hi Pool E-ah awmin AP leh Chandigarh bakah Kerala an awmpui a. Thawhtanni tuk hian group stage-a an hmachhawn hmabak awmchhun hi an tum leh ang.

Pool tina a sang ber theuhten quarterfinal an lut thei dawn a, Mizoram hi khelh hnih an chak tawh avangin beiseina a sang hle a. An hmachhawn leh tur, Kerala hi an khelh tawh dan atangin team nem tura ngaih a ni a, Chandigarh laka tlawmin AP nen goal awm lova inhnehtawk an ni.

Mizoram team hi coach Lalrothuami leh manager K.Lalchamreii ten an hruai a. SAI Training Center (STC), Thenzawla zirlai 13 leh Imphal, Kolkata leh Mumbai-a SAI National Centre of Excellence (NCOE)-a awm mek player pakhat theuh, an vaiin 16 an ni.