ZALEN, Dec. 02, 2024: Mizoram aiawha 14th Hockey India Sub-junior Women’s National Championship 2024-a inlan Mizo tleirawlte chuan group stage-ah chak vekin quarterfinal an lut ta.

Secunderabad, Telangana-a Thawhlehni atanga inelna tanah hian Mizo tleirawlte hian Arunchal Pradesh chu 11-0 zeta an sawp hnuah Inrinni tuk khan 4-1-in Chandigarh an hneh leh a, Thawhtanni khan Kerala chu 7-0-in an sawp leh a, khelh thumah an chak vek.

South Central Railways Sports Complex-a Pool E inkhel hnuhnung berah hian Mizoram tan Laldinpuii chuan goal li zet a vaw lut a. Captain Laltlanchhungi, Vanlalrinhlui leh Manglawmsang ten goal khat theuh an thawh bawk.

14th Hockey India Sub-Junior Women’s National Championship-ah hian state 28 telin pool riatah then an ni a, a sang ber theuhvin quarterfinal lutin Mizoram hian semifinal luh inchuhnaah Uttar Pradesh chu naktukah an hmachhawn ang.

Uttar Pradesh hi team thum awmna, Pool D-a a sang ber niin an awmpui, Uttarakhand leh Rajasthan hneh ve vea tlang an ni.

Mizoram team hi coach Lalrothuami leh manager K.Lalchamreii ten an hruai a. SAI Training Center (STC), Thenzawla zirlai 13 leh Imphal, Kolkata leh Mumbai-a SAI National Centre of Excellence (NCOE)-a awm mek player pakhat theuh, an vaiin 16 an ni.