ZALEN, Oct. 4, 2024: Indian Weightlifting Federation (IWLF) buatsaih ram pum huap intihsiaknaa tel turin Mizoram aiawh tur rit chawi chak 12-te chuan Zirtawpni khan an tum ram an pan a. Tun tum inelnaah hian Mizo 14 an inlan dawn a, an zingah Jeremy Lalrinnunga pawh a tel.

IWLF Youth, Junior leh Senior National Weightlifting Championships hi Nagrota Bagwan, Himachal Pradesh-ah Pathianni atang tan tur niin Pathianni lo awm leh tur thleng a awh ang.

Tun tum intihsiakna neih turah hian Mizoram aiawh hian tun hnaia Commonwealth Junior Weightlifting Championships-ah India ram tana kg 89 huanga silver medal latu, Bungzung tlangval, Lalruatfela pawh a tel a. National Centres of Excellence (NCOE), Patiala, Punjab-a awm mek hian kg 89 huangah tho a chawi ang.

Ruatfela bakah hian Keitum nula, Zosangzuali a tel dawn bawk a. Ani hian +102 kg (Youth)-ah leh +107 kg (Junior)-ah inelna hi a hmachhawn ang.

Khelo India State Centre of Excellence (KISCE), Sports & Youth Services (SYS), Rajiv Gandhi Stadium Hostel-a awm mek, Sangzuali hian July thla khan Asmita Khelo India Youth, Junior leh Senior Women’s League Zone A-ah +81kg Youth-ah silver, +87kg Junior-ah gold leh +87kg Senior-ah Mizoram tan silver medal a la ni.

Mizoram aiawha feh chhuak rit chawi chak 12-te hi official mi pathum - K.Zonunsanga, coach, Mizoram State Sports Council (MSSC)/Bethlehem Vengthlang; Lalremruata, asst. coach/Laipuitlang leh Narayan Lama, manager/Saron Veng ten an hruai.

Mizoram aiawha rit chawi turte bakah hian Services Sports Control Board (SSCB) hmingin Mizo pahnihin he inelna hi an hmachhawn dawn bawk a. Mizo zinga rit chawi chak hriat hlawh bera chhal ngam, Jeremy-a pawh 67kg huangah a inlan ang.

Ainawn Veng tlangval bakah hian SSCB, Pune-a a awmpui, Lalhunthara pawhin 73kg huangah inelna hi a hmchhawn dawn bawk.

MIZORAM AIAWHA INLAN TURTE:

1. Laithanpuia - 55 kg (Youth), MSSC Weightlifting Academy/Sairang

2. Isak Malsawmtluanga - 61 kg (Youth), NCOE, Imphal/Ramhlun Sports Complex

3. Lalzuidika - 61 kg (Senior), Army Sports Institute (ASI), Pune/TNT

4. Silvan Beihrothatlo - 67 kg (Junior & Senior), Army Sports Institute (ASI), Pune/Siaha

5. Zakhuma - 67 kg (Senior), Army Sports Institute (ASI), Pune/Ainawn Veng

6. TBC Lalchhanhima - 73 kg (Senior), Army, Jabalpur/Champhai Ruantlang

7. Jacob Vanlaltluanga - 73 kg (Senior), Army Sports Institute (ASI), Pune/Ainawn Veng

8. Lalruatfela - 89 kg (Junior/Senior), NCOE Patiala/Bungzung

9. David Lalzawmdika - 102 (Youth), NCOE, Imphal/Sialhawk

10. David Zohmingmawia - +102 kg, NCOE, Imphal/Lawipu

11. Lalchhanhimi - 71 kg (Senior), SSB, Delhi/Khawzawl

12. Zosangzuali - +102 kg (Youth) & +107 kg (Junior), KISCE Aizawl/Keitum