ZALEN, Dec. 03, 2024: Captain Laltlanchhungi vuak luh hmangin 14th Hockey India Sub Junior Women National Championship 2024-ah Mizoram chuan semifinal an lut ta.

Secunderabad, Telangana-a inelna kal mekah Mizoram tleirawlte hian hnehtu an la tawng lo va, Thawhlehni tuka a thiam pali zinga luh inchuhna inkhelah hian Uttar Pradesh chu 1-0-in an hneh.

Captain Tlanchhungi hian 4th quarter minute 49-ah penalty stoke atangin Mizoram chakna goal a thai lut a. Ani hian captain hna tlin taka thawkin tun inelnaah hian khelh li-ah goal sarih a thai lut tawh.

Mizoram hian group stage-ah Pool E-a an awmpui - Arunachal Pradesh, Chandigarh leh Kerala hneh vekin quarterfinal an lut a, a thiam pali zingah an tel zui ta a, goal khat chiah an lamah a la lut a ni.

Ningani hian Madhya Pradesh nen final luh an inchuh zui dawn a. Anni hi group stage-a tlawm lo leh goal chhuah lo ve bawk an ni a, quarterfinal-ah Haryana laka 3-2-a chakin an tlang.

Semi final lehlamah Jharkhand leh Odisha te an inhmachhawn bawk ang.

14th Hockey India Sub Junior Women National Championship 2024 hi kar kalta Thawhlehni atanga khelh tan kha niin Zirtawpnia final khelh tura ruahman a ni.