ZALEN, Dec. 05, 2024: Mizo tleirawlten goal thun hmasa mah se hun tawp dawna an chhuah veleh hlauh avangin 14th Hockey India Sub Junior Women National Championship 2024-ah Mizoram chuan final an lut zo ta lo.

Secunderabad, Telangana-a inelna kal mekah Mizoram tleirawlte hian semifinnal-ah Ningani tuk khan Madhya Pradesh an hmachhawn a, 3-2-in an tlawm.

Ruthi Lallawmzuali’n minute 3-na lekah penalty corner atangin Mizoram tan goal hmahruai a vaw lut a, minute 10 hnuah Naz Nousheen chuan Madhya Pradesh tan a sut.

Minute 32-ah Madhya Pradesh tan Rubi Rathore chuan hma an hruaina goal vaw lut zuiin Mizoram tan minute 52-ah captain Laltlanchhungi’n a sut a, 2-2 a ni.

Hun tawp nan minute 4 chiah a awm tawh a, minute 56-ah Tanvi chuan Madhya Pradesh tan chakna goal, final luh phahna vaw lut hlauhvin Mizo tleirawlten final an lut zo ta lo a ni.

Mizoram hi tun championship-ah hian an kaltlang hle a, Pool E-ah awmin Arunachal Pradesh, Chandigarh leh Kerala an hneh vek a. Quarterfinal-ah Uttar Pradesh chu hneh lehin semifinal hma zawng hian an lamah goal khat chiah a lut a, goal 22 an vaw lut tawh thung.

Madhya Pradesh pawh hi group stage-a tlawm lo leh goal chhuah lo ve bawk an ni a, quarterfinal-a Haryana laka 3-2-a chakin an tlang a. Mizoram an hneh leh hnuah final-ah Jharkhand leh Odisha chak zawk zawk an inhmachhawn ang.

14th Hockey India Sub Junior Women National Championship 2024 hi kar kalta Thawhlehni atanga khelh tan kha niin Zirtawpni hian final khelh tura ruahman a ni.

Mizoram team hi coach Lalrothuami leh manager K.Lalchamreii ten an hruai a. SAI Training Center (STC), Thenzawla zirlai 13 leh Imphal, Kolkata leh Mumbai-a SAI National Centre of Excellence (NCOE)-a awm mek player pakhat theuh, an vaiin 16 an ni.