National Games 2023-a Mizoram atanga rit chawi chak (weightlifter) inlan turte chu Mizoram sorkarin thla thar atangin an ei leh in an tihthatna atan bik thla khatah Rs. 20,000 zel a tumsak dawn.

Mizoram Weightlifting Association (MWLA)-in huang hrang hranga Mizoram State Level Weightlifting Championships a buatsaih kharna a hmanpuinaah October thla tawp lama Goa-a India-a infiamna kûtpui nghah tura rit chawi chak inlan tur mi palite puihna tur hi Robert Romawia Royte, Sports Minister-in a puang a ni.

Robert-a chuan, “Weightlifting hmangin India-ah a chhuanvawr kan ni thei tih chu Jeremy (Lalrinnunga) hmangin kan ni thei tih kan finfiah tawh a. National Games-ah pawh hian Mizoram atanga a tel tur palite chu September 1 atang hian intihsiakna neih hma zawng thla tin sorkarin an ei leh in (nutrition) tihthatna atan Rs. 20,000 zel sorkarin a tumsak dawn a ni,” a ti.

Lifter-te puihna tur hi Chief Minister Zoramthanga nena sawi duna a pawmpui hnuah ruahmanna siam a ni tih a sawi bawk.

Robert-a hian September thlaa India aiawha China-a Asian Games nghah turah tun thlengin Mizo paruk inlan tur an awm tih a sawi a. Hengte hi Vanlalthlamuanpuia (Taekwondo), Hmnangaihsangpuia (Karate), Lalhumhimi (Judo), Lalremsiami Hmarzote (Hockey) leh football player pahnih, Lalengmawia Ralte leh Lalchungnunga te an ni a. Infiamna thenkhatah pawh kal beiseiawm an la awm mek tih a sawi bawk.

MWLA-in 4th Youth (Boys & Girls), 13th Junior leh 18th Senior Men & Women Mizoram State Level Weightlifting Championships a buatsaih hi Ningani atang khan Weightlifting Academy, Ramhlun Sports Complex-ah tan niin Zirtawpni tlai khan khar a ni.

Mizorama inelna hi Army Sports Institute, Pune-a weightlifting incharge Lt. Col Nikhil Singh leh weightlifting coach M. Syamlal te pawhin chhimin Mizo thalai zingah an zirna ina enkawl tur atana thate an dap nghal a ni.

MWLA state championships-ah hian rit chawi chak 88 zet an inlan a. Hengte weightlifting club pasarih atang niin mipa 53 leh hmeichhia 35 an ni.

Indian Weightlifting Federation (IWLF) pawhin state level championship hi a ngai pawimawh a, he huanga inlan lo chu national championship-a an inlan pawh a phal lo va, hei vang hian lifter-te pawhin state huap inelnaa inlan ngei hi an tum thin. 

Inelna kharna inkhawmah hian Commonwealth Youth Games-a gold medalist leh Asian Youth Weightlifting Championship-a palina, Lalruatfela, Bungzung hnenah chawimawina hlan niin a nu leh pa leh a farnuin an tawiawm a ni.