ZALEN, Feb. 03, 2025: Uttarakhand-a 38th National Games kal mek zelah TC Lalremruati’n quarterfinal a lut a, thalkahah Vai Bhav chuan round of 32 a lut bawk a. Hetih lai hian Thawhtanni tlai hian football (mipa)-ah chak ngei ngei ngai tawh Mizoramin group stage inkhel hnuhnung ber an hmachhawn dawn.

Pathianni khan Pithoragarh-a 57-60kg pre-quarter final-ah Remruati hian Odisha boxer Nibedita Swain chu round hnihnaa RSC (referee stops contest)-a hnehin quarterfinal a lut.

Remruati hian round hmasaah pawh a tumpui hi a hneh hle a, round hnihna an khelh laiin referee-in Swain-i khelh dan leh dinhmun enin khel zui chi nia a hriat loh avangin a titawp ta ringawt a ni.

Hetih lai hian boxing-ah tho, 54-57kg pre-quarterfinal-ah Lalruatfela a chak zo lo thung a. Uttar Pradesh boxer Manish Rathore lakah point-in a tlawm a, Fela lakah hian round tinah a chungnung zawkah tangin phu takin hnehna a chang a ni.

Dehradun-a archery (thalkah) inelnaah Indian round qualifying-ah Bhav chuan point 637 kap chhuakin 20-na dinhmun a hauh va, round of 32 a inhlankai a. Hetih lai hian he round-ah vek hian Isak Lalchuoilova chuan point 625 kap chhuak mah se 35-na a ni a, round of 32 a inhlangkai zo ta lo thung.

Thawhtanniah hian vawi hnih khelha point li hmu tawh, Mizoram mipa football team chuan pool match hnuhnung berah Assam an hmachhawn dawn a. Mizoram dinhmun a derthawng hle a, semi final lut turin an chak ngei a ngaih bakah Goa leh Uttarakhand inkhelah result an ngaihchan tel a ngai.

Mizoram hian an khelh hmasak berah a thlengtu, Uttarakhand nen 1-1-a inhnehtawkin a vawi hnihnaah Goa chu 2-0-in an hneh a ni.