ZALEN, Jan. 30, 2025: Uttarakhand-a 38th National Games khelh mekah Mizo infiam mite chu Ningani atangin an inlan tan a, wushu-ah Narareth Lalthazuala chuan semi final a lut nghal a. Football mipaah Mizoram leh inelna thlengtu chu an inhnehtawk bawk.

Nazareth-a tan final thlir nghal

Dehradun khawpuia kg 54 hnuai lam inelnaah Nazareth-a hi pre-quarterfinal-ah awl (bye)-in quarterfinal a lut sa a. Quarterfinal-ah hian a thlengtu state aiawha inlan tumin a hneh chiang hle.

Round thum khelh turah round hnih chauh khelin Mizo tlangval hian hnehna a chang a. First round-ah 4-2-a hnehin second round-ah a aia chiangin 8-2-in a hneh zui leh a, round thum khelh ngai lovin semifinal a lut.

Semifinal-ah Punjab aiawha inlan nen an insu dawn a. Coach Lalrinliana chuan an khelh dan enin final hi a luh ngei a rin thu a sawi.

Mizoram 1-1 Uttarakhand

Mipa football-ah Mizoram chuan a thlengtu bawk an su nghal a, Nainital-a inkhelah hian a nawrtu zawk ni mah se si khat bak an thun theih bik loh avangin 1-1-in an inhnehtawk.

First half-ah goal a lut lo va, second half-ah Mizoram tan Lalhmunmawia’n goal hmahruai a thun a. Uttarakhand-in si phurh chhan let tumin an rawn nawr zui nghal a, Mizoramin an dan zawh loh avangin point 1 ve ve-ah an duh tawk a ngai ta a ni.

Manager Andrew Lalremkima Pachuau chuan, “Hneh thei kan ni a, chance pawh kan neih tam zawk bawk; mahse, goal-ah kan chantir theih loh vangin kan tuar a ni ber,” a ti a. “Kan khel erawh a mawi a, ka player-te an inman a, Goa kan tum hunah erawh chak ngei turin kan khelh a ngai tawh dawn a ni,” a ti.

Football-ah hian Mizoram hi Pool-A ah Uttarkhand bakah Goa leh Assam an awmpui a. Pool B-ah Services, Kerela, Manipur leh Delhi an awm thung a. Group stage-a a sang pahnihin semifinal an lut ang.