Aizawl: March 15, 2017  Prime Minister Narendra Modi a kaihhruainaa Union Cabinet in a pawm tak National Health Policy 2017 chu buaipui \an mek a nih thu Health & Family Welfare Department Director, Dr. H Lalchungnunga chuan Zalen a hrilh. Thudawn danin National Health Policy hian India ram mipui zawng zawng, nausen atanga kum upa thlengin, hrisel taka an awm a, an damloh nikhua pawha an mamawh ang inenkawlna tha sum leh pai lama harsat phah si lova an awm chu a tum ber a ni a. Hei hi Universal Health Coverage (UHC) niin khawvel ram changkang United Kingdom, Japan leh ram changkang dang thenkhatte chuan kum tam tak an lo kalpui tawh a, UHC hi thawklehkhatah thlen nghal theih ni lo mahse hemi thleng tur hian he policy hmang hian nasa hma lak a ngai dawn niin thudawnna chuan a tarlang bawk. National Health Policy document ah hian target hrang hrangte tarlan a ni a. Chung zingah chuan nausen kumkhat hnuailam thi zat chu kum 2019 hmain nausen piang 1000 zela 28 aia tlem a ni tur a ni tih a ni a, hei hi 2015-ah khan State HMIS report-a a lan danin 32 a ni. Hei bakah hian zunthlum, thisen sang, cancer, lung leh chuap lam natna te avanga damlohna leh thihna tihhniam te pawh target zingah hian telh a ni a, kum 2020 a chuan tuna vaihlo hmangtu zat zaa 15-a tlakhniam tir chu target pakhat a ni bawk. Heng bakah hian target pawimawh tak tak tarlan a ni bawk. He policy hmang hian sawrkar laipui chuan hmalakna tur a ruahhman a, chung zingah chuan Health budget tihpun, Health programme hrang hrangte tun aia tha a hnathawk thei tura tih changtlun, Sawrkar hnuaia damdawiin, sub-centre leh a dangte hnathawh dan tun aia tih changtlun, mipuite him zawk nana drug safety, food safety leh damdawi man chhiar dan (pricing) uluk taka endik reng te, Information Technology nasa zawka hman tangkai te, khawtlang hruaitute nena thawhho \hat leh heng bakah hian thil dang pawimawh te ruahman a nih thu thudawnna chuan a sawi. Thudawn danin India ram tana National Health Policy hmasa ber chu kum 1983 a pawm niin a pahnihna chu 2002 khan kalpui tan leh a ni a. Tuna sawrkar laipuiin National Health Policy, 2017 a rawn duanchhuah hi a pathumna a ni.