ZALEN, September 02, 2025: Thawhlehni atanga khelh tan, 75th Junior (Boys) National Basketball Championship-a an khelh hmasak berah Mizo rawltharte chuan hnehna an chang.

Basketball Federation of India (BFI) buatsaih inelna hi Ludhiana Basketball Academy, Guru Nanak Stadium, Ludhiana, Punjab-a neih niin Mizoram hian Group C-a an inkhel hmasa berah Puducherry chu 67-65-in an hneh.

Mizoram hi group paruka an inthenah Group C-ah awmin an khelh hmasak berah hnehna an chang ta phawt a. Nilaini hian Gujarat an hmachhawn leh ang a, Ninganiah hian zingah Goa hmachhawnin zanah Odisha an hmachhawn zui bawk ang.

Inelna hi karleh Thawhlehni thlenga kalpui tur a ni.

Mizoram Basketball Association (MBBA) hruaitute chuan Mizo rawltharte zin chhuah hma hian he inelnaah hian an thleng sang lutuk ngai lo va, tun tumah erawh chuan an player-te enin an beisei a sang tih sawiin kum dang aia thlen thui ngei an inbeisei tih an an sawi a. An khelh hmasak berah hnehna an chang nghal ta phawt a ni.