ZALEN, August 28, 2025: Thawhlehni atanga khelh tan tur, Under-18 75th National Junior Basketball Championship (Boys) khel turin Mizoram rawlthar rualten Zirtawpni hian Mizoram an chhuahsan dawn.

Mizoram Junior (Boys) team-ah hian player 12 bakah coach leh manager/asst. coach an kal dawn a, an zin chhuah hmain Nilaini khan Hawla Indoor Stadium-ah Mizoram Basketball Association (MBBA) hruaitute nen sawiho ngai leh tulte inhrilh a ni. 

Basketball Federation of India (BFI) buatsaih inelna hi Ludhiana Basketball Academy, Guru Nanak Stadium, Ludhiana, Punjab-a neih tur a ni a. Mipa leh hmeichhe inelna tur niin Mizoram hian mipa team chauh a tir thung a, tun tumah hian state 32 atangin an inlan dawn a ni.

Mizoram hi group paruka an inthenah Group C-ah awmin Odisha, Goa, Gujarat leh Puducherry an awmpui a. An inkhelh hun tur tak erawh a la chiang thei rih lo thung a. September 9 thleng inelna hi kalpui a ni dawn a ni.

MBBA chuan Mizoram team hi tha taka khel turin duhsakna a hlan a. Tun hma lamin national junior championship-ah hian Mizoram hi an thleng sang lutuk ngai lo va, tun tumah erawh chuan an player-te enin an beisei a sang a, kum dang aia thlen thui ngei an inbeisei tih an hruaituten an sawi.

Mizoram Junior (Boys) Team:

1. Lalrinchhana, Kulikawn

2. Christian Lalhmachhuana Sailo, Kanan

3. Emmanuel Lalpekhlua, Republic

4. C.Lalfakzuala, ITI

5. Joel Lalbiakhlua, Khatla South

6. Lalfakpuia, Tuikual South

7. Samuel Vanlalpeka , Kulikawn

8. Christopher Lalfakawma, Champhai

9. Roney Vanlalawmpuia, Bungkawn

10. Jacob C Vanlalruatdika, Khatla South

11. R.L Rinchhana, Tuikual North

12. P.C Lalawmawma, Salem Veng

Coach: K.C Lalliantluanga, Armed Veng South

Manager/Asst. Coach: Richard Lalropuia, Thuampui