ZALEN, September 07, 2025: Punjab-a 75th Junior (Boys) National Basketball Championship khelh mek zelah Mizoram chuan Level 2 final an lut a, Thawhtanni hian Himachal Pradesh nen final-ah an inhmachhawn dawn.

Kum 18 hnuai lam tana Basketball Federation of India (BFI) buatsaih inelna hi Ludhiana Basketball Academy, Guru Nanak Stadium, Ludhiana-ah Thawhlehni atang khelh niin Mizo rawltharte hian Group C-ah vawi li khelhah vawi thum hnehna changin group stage an khar.

An group-ah hian Gujarat leh Odisha nen chak zat inangah khawthlang state rawltharte point thum tamah phak lovin pahnihna an ni a, Level 1 an kai phak lo va, Level 2 knockout round an khel zui a ni.

Knockout round-a an khelh hmasak zawkah Zirtawpni chawhma khan Jammu & Kashmir lakah 61-40-a hnehna chang nghalin semifinal an lut a. Semifinal hi Pathianni tuk khan khel zuiin Uttarakhand lakah 57-65-in hnehna an chang leh a, Thawhtanni hian final an khel ang.

Knockout round hi ranking atan group tina pahnihna theuhten group danga pathumna an khelh lehna a ni a, nakuma ram pum huap inelnaa an khelh leh tura ranking hriltu tur a ni a, Mizo rawltharte hi an champion a nih chuan nakum inelnaah No. 11 an ni thei dawn a ni.