ZALEN, September 04, 2025: Punjab-a 75th Junior National Basketball Championship khelh mekah Mizoram chuan an pool match an khel zo ta a, Level 1 an kai dawn leh dawn loh erawh an pool-a state dang inkhel pakhatin a hrilh dawn.

Kum 18 hnuai lam tana Basketball Federation of India (BFI) buatsaih inelna hi Ludhiana Basketball Academy, Guru Nanak Stadium, Ludhiana-a Thawhlehni atang khelh niin Mizo rawltharte hian Group C-ah vawi li khelhah vawi thum hnehna an chang.

Inelna tan nia Puducherry laka 67-65-a hnehna an chan hnuah Nilaini khan Gujarat lakah 57-50-in an tlawm a. Ningani chawhma khan tho chhuak lehnghalin 84-68-a Goa hneh lehin zana pool inkhel hnuhnung berah 80-63-in Odisha lakah hnehna an chang leh bawk.

Mizoram hian Level 1 an kai leh kai loh hre turin an Zirtawpni tuka Gujarat leh Odisha inkhel result an ngaihchan rih phawt a ngai.

He inkhelah hian Odisha an chak chuan Gujarat leh Mizoram nen an chak zat a inang vek dawn a. An pathum bik chu an khelh tawhnaa an score chhutin a titha berin Level 1 an kai dawn a. Gujarat an chak a nih erawh chuan an tumpui hneh vekin Level 1 an kai dawn a. Mizoram hi pahnihna niin Odisha pathumna an ni ang.

Mizoram hi Level 1 tling zo lo pawh ni se inelna hmachhawn zui tur an la nei a. Ranking atan group tina pahnihna theuhten group danga pathumna an khel leh dawn a ni.

Gujarat-in Level 1 kai khalh pawh ni se ranking khelh hmabak an neih hi a pawimawh hle a, nakuma ram pum huap inelnaa an khelh leh tura ranking hriltur tur a nih avangin inthlahdah a thiang chuang lo a ni.

Junior National Basketball Championship-ah hian Mizoram hi tun hma lamin an che tha vak ngai lo va, kuminah erawh an player-te enin an beisei a sang tih an lo sawi tawh a, tunah hian an khelh tawh chinah an hmuhnawmin theihna sang tak an nei nia an hriat thu Mizoram Basketball Association (MBBA) hruaitute chuan an sawi.