National Lok Adalat huaihawt

Admin - Sep 12, 2021

Rorel kalphung hi Law Court-a mi te nen chuan a dang

Aizawl: National Legal Services Authority, New Delhi in ruahmanna a siam 
dung zuiin nimin khan Gauhati High Court, Aizawl Bench leh State Legal 
Services Authority Office, New Capital Complex te bakah District 8-a 
District Legal Services Authority Office, District Court Complex ah te 
National Lok Adalat huai hawt a ni. 

Mipuite Court tia sawi thin Lok Adalat ah hian thubuai 
compoundable case te, inhmun lo ram thubuai leh ro inchuh thubuai te, 
leiba thubuai te bakah thubuai dang tam tak a rel theih a. Lok Adalat ah 
hian Conciliator ten thubuai lian pui pui leh khirhkhan tak tak te pawh an lo 
rel fel tawh thin a ni. Niminah hian SBI, Bank of Baroda, Punjab National 
Bank leh MRB atanga loan la, mahse rul tha leh duh si lo te thubuai a tam 
ber a. Lok Adalat rorelna ah chuan sum senga Ukil rawih a ngaih ve loh 
avangin senso a awm ve lo. Rorel kalphung hi Law Court-a mi te nen 
chuan a dang daih a ni. 

Thiam loh chang zawk pawh awm se, inhremna pek a ngai kher 
lo. Thiam chang zawk pawh inphah hniam tura ngen leh thiamloh chang 
zawk pawhin a tih diklohna te pawma inremna zawnpui kha Lok Adalat 
thiltum ber chu a ni. Hetiang rorelna hi Mizo te rilrem zawng tak a nih 
avangin mipuiten Lok Adalat hi an hmang tangkai hle a, Lok Adalat in 
thubuai a rempui tawh te inremna/ award hi rel thatsak turin India ram Court 
sang berah pawh appeal kalpui theih a ni lo. 

Share now