Aizawl: Nimin khan Mizoram State Legal Services Authority (MSLSA) office, New Secretariat Complex-ah National Lok Adalat neih a ni a, thubuai lut 760 ngaihtuah a ni. Nimin National Lok Adalat-a thubuai lutte hi BSNL thubuai 400, Bank Loan thubuai 280, in hmun lo ram thubuai, pawisa inpuk thubuai, chhungkua thubuai chungchang leh a dangte an ni a. National Lok Adalat-ah hian thubuai eng emaw zat chin fel a ni bawk. Heng thubuaite hi mi thiam thlan bikten Bench 4-ah an ngaihtuah a ni. Company leh Bank lam chuan an hnena leiba neite chu zaa 50 vel zel ngaidamin, an chawi tur pe tlak a nih chuan an thubuai tihtawp a ni thin a ni. National Lok Adalat hi Gauhati High Court Judge, Justice Michael Zothankhuma’n a hmanpui a, Judge chuan thu sawiin, “Lok Adalat hi India ramah tangkai taka hman a ni a, Court lama thubuai inchiah rei lutuk tur rei lote-a chinfel nan te, thubuai neiten inrem taka an thubuai te an chinfel nan te a tangkai hle a ni,” a ti.