Aizawl: Nimin khan Mizoram Science, Technology & Innovation Council (MISTIC) bul tumin Vanapa Hall-ah National Science Day 2016 lawmna neih a ni a. Planning Minister Lalsawta’n hmanpuiin, hemi puala tualchhung thil siam chhuah thar pho chhuahna chu a hawng nghal. Khuallian chuan Mizopa siam ngei khawl thar tha leh tangkai tak tak tur pho chhuahte chuan Mizopa thluakin phak loh a neih bik lohzia a lan chiantir hle a ni tiin, a siamtute leh mi thiamte tan rualnaa chu aia changkang leh ropui zawk chu siam chhuah a la nih theih tur thu a sawi. Ni tin khawsak kawng eng kimah awlsam, rang leh hlawk zawka hna thawh nana Science chhawr tangkai thiam a pawimawhzia sawiin, Planning Minister chuan chuti lama thiamna neite chu an theihna leh thiamnate ram tana tangkai taka hmang turin a chah a. Hmasawnna kawnga pen thum pen turah hmanrua leh khawl tangkai siam chhuah chu pen khatna a ni tiin, a chhawr tangkai thei tur mipuite hnena thiamna hlan chhawn a, chuta tanga an thil siam chhuahte deh ralna tur lam buatsaih chu ke pen lehna tur a ni, a ti bawk. Planning Secretary Dr C.Vanlalramsanga chuan Science leh Technology chuan thingtlang khaw kilkhawr ber thlenga a nghawng vek avangin a pawimawhzia hriat a, inzirtir uar deuh deuh a tul a ni, a ti. Chief Scientific Officer Dr RK Lallianthanga chuan National Science Day hman chhan a sawi fiah a. India scientist Sir CV Raman-a’n February ni 28, 1928-a Raman effect a hmuh chhuah ni hriat reng nan, kum 1987 atang khan February 28 hi National Science Day-ah hman thin a ni tiin, kumin erawh chuan Chawlhni a nih avangin February 27 (Inrinni)-ah hman a ni, a ti a. Science & Technology Department chuan thil siam chhuah lama thiamna nei leh a tui mite tihphur a, dawm kan zel a tum thu sawiin, thil thar siam chhuah neitu nihna hauhtute chhinchhiah hna (patent filing) pawh an kalpui mek thu a sawi. National Science Day 2016 thupui (theme)-ah hian “Make in India : Science & Technology Driven Innovation” tih hman a ni.