ZALEN, Jan. 9, 2025: Nilaini atanga tan, Asmita Khelo India Women National Weightlifting Championships Youth, Junior leh Senior-a inlan turin Mizo nula ritchawi chak pahnih an thang mek.

Inelna hi Brahmapur, Odisha-ah Thawhlehni thleng neih tur a ni a, Mizoram atang hian Khelo India State Centre of Excellence (KISCE), Sports & Youth Services (SYS) atangin lifter pahnih tlingin Nilaini khan inelna tur hmun hi an thleng.

Mizoram atang hian Cindy Lalparmawii (76 kg) KISCE/Kolasib Saidan leh Zosangzuali (+87) KISCE/Keitum an tel dawn a. Cindy-i hi nikum July thla khan East Zone-ah Youth leh Junior-ah bronze medal a la ve ve tawh a, Thawhtanni hian a chawi ang.

Keitum nula, Zosangzuali pawh hi nikum July thlaa East Zone inelnaah tho khan Youth-ah silver, Junior-ah gold leh Senior-a bronze lo la tawh a ni a. A tawp nia chawi tur niin Mizo nulate hi an sulhnu enin an lakah beiseina a sang hle.

Cindy-i leh Zosangzuali te hi official pahnih, Malsawma Khiangte, Coach SYS, Bethlehem Veng leh Malsawmtluangi, Masseuse KISCE, Republic Vengthlang ten an kalpui.