ZALEN, Jan. 13, 2025: Brahmapur, Odisha-a Asmita Khelo India Women National Weightlifting League Youth, Junior leh Senior khelh mekah Thawhtanni khan Cindy Lalparmawii chuan kg 76 Youth-ah bronze medal a la.

Cindy-i hian snatch-ah kg 54 leh clean & jerk-ah kg 60, a vaiin kg 114 a chawi a. Vaishnavi, Haryana-in gold medal lain Prativa Rani, Odisha-in silver medal a la thung.

Tun tum inelnaa telte hi nikuma Asmita Khelo India zone hrang hranga tithate inelna a ni a. Cindy-i pawh hi nikum July thlaa Bhubaneswar-a East Zone-ah khan Youth-ah silver leh junior-ah bronze medal a la a ni.

Tun tum inelnaah hian Saidan, Kolasib ritchawi chak, Cindy-i bakah hian Keitum nula, Zosangzuali a tel bawk a, ani hian +81kg huangah Thawhlehni hian a chawi ve thung ang.

Cindy-i hi Khelo India State Centre of Excellence (KISCE), Rajiv Gandhi Stadium, Salem Veng, Mualpuiah hostel awmin coach Malsawma Khiangte (Sports & Youth Services) zirlai a ni a. Tun tum inelnaah pawh hian coach bakah Malsawmtluangi, Masseuse, KISCE, Republic Vengthlang ten an hruai.

Mizo nula pahnihin India ram pum huap inelna an hmachhawn mek lai hian January 28 atanga tan tur, 38th National Games, Uttarakhand-a tel turin Mizoram atangin lifter pathum - Silvan Beihrothatlo (67kg), Army Sports Institute (ASI), Pune/Siaha; Lalruatfela (89kg), NCOE, Patiala/Bungzung leh hmeichhiaah Lalchhanhimi (71kg), SSB, Delhi/Khawzawl te an tling bawk.