Aizawl March 21, 2023 : Lunglei Municipal Council Ward No. 1 huam chhung Zotlang leh Ward no 2 huam chhung Zohnuai-ah vawiin khan street campaign neih a ni a. MNF Adviser Lalruatkima chuan thu sawiin, "Nau chu a paitu ngeiin a hring ang a, a hringtu ngeiin a enkawl zui dawn a ni. Chu chu thil kalphung tur a ni," a ti.

Lalruatkima chuan, "Lunglei mipui zawng zawngte MNF candidate chhinchhiahna 'Arsi' ah lo vote vek turin thinlung takin kan ngen che u a ni," tiin, "He MNF sawrkar hian kawng hrang hrangin hmasawnna a thlen a. Health care changchangah te, kawngpui siam that chungchangah te leh kum 5 kal ta kha thlirlet ila. Hripuiin kum 2 min tibuai chungin hma kan sawn nasa hle. Gas a hnianghnar ta hle a, buhfai tha thlan ngai lovin a tha ta vek mai a. He sawrkar hian nitin ei bar mamawh hnianghnar takin min pe zel a ni," a ti. 

MNF Adviser chuan, "Ramri humhalh chungchangah MNF chu a tlanchhe ngai lo a, huaisen takin ke a pen ngam a ni. Thisen hial a chhuak a nih kha. Hripui a lo leng a, kan phek buai a. Phaia eizawng leh zirlai an lo haw hum hum a. Mizo tlawmngaihna a lo lang a, 'thenawmten an nghei ang' tih hlauin kan indawmkang tlang a. Kum 2 chhung kum chhia kan tawk a, ramri buai, ram kang, hripui, vawk pul hri leh lirnghing kan tawk a ni. Pathian hruainain chhuanchham kan awm lo. He sorkar hun chhia min petu Pathian hian kum ṭhat kum min pe ang tih hi ka ring tlat a ni," a ti bawk. 

Party dang chungchang sawiin Ruatkima chuan, "Congress party hi an phur lo em em mai a, that loh theih lohna bawm an zuar a. An bawm zawrhah hian an mahni intifai hmasa phawt rawh se, mipuiin an ti a ni. Central lamah an khawnvartui a kang tawh a, tih tlak an awm tawh lo. Tun LMC-ah pawh hian beisei tur an awm tawh lo a ni," a ti a. "ZPM hi social media-ah an sawrkar a. Anni hi hmana kan hriat ṭhinte kha an ni a, an kawrhak an thlak mai a ni. Election apiangin symbol an thlak a, a mumal loh thlak hle. Pawl thar siam te, pawl hming thlak te an uar em em mai a. Tun LMC inthlanah pawh an symbol an thlak leh tak hi. Zoram Exodus Movement, ZNP leh MPC te an inchhungkhawm a. Pawl hrang hrang kalkhawm tih takah an inngeih lo hle a. An chhungril innghirnghona hi a puahdarh hun a awm ngei ang," a ti bawk.