ZALEN March 13, 2026 : F. Lallawmkimi kum 31 w/o PC. Lalremruata, Zobawk Venghlun chu nimin khan a nau pai avanga Civil Hospital, Lunglei OPD-ah a inentir a, a inentir atanga darkar 4 vel hnuah pawnlam thingpui dawr inthiarna bulah nau a nei a, naute hi NBCU-ah dah a ni a, F. Lallawmkimi erawh nimin tlai dar 6:30 Pm vel khan a thi a, vawiin chawhma dar 11:00 khan Zobawk Venghlun-ah vuiliam a ni.

Hemi chungchangah thil thlen dan hi damdawi in-ah zawfiah nghal a ni a, thulakna-in a tarlan danin F. Lallawmkimi hi Ni 12/3/2026 hian Civil Hospital OPD-ah hian Dr. H. Thangliana, Gyanecologist Doctor hnenah a inentir a, a ke a lo avangin Doctor hian natna a neih te a zawt a, Lawmkimi hian a naupan lai atanga Lungna a neih thin thu a sawi a, Doctor hian fimkhur thu-ah he damdawi in-ah vek hian Lung endik turin a tir nghal a, kar leh Thawhtanni (16/3/2026) ah kal leh tura hrilhin nau a neih a la hun loh thu pawh a hrilh a ni. 

Gynae Doctor hrilh ang hian Civil Hospital-a Lung endikna lamah chuan an kal a, mahse Cardiocologist Doctor a lo awm loh avang a inentir thei lovin an chhuak a, khawlaiah engengemaw lei tur zawng in an vak kual a, Police Thana bula thingpui dawr-ah a chawl a, inthiar a duh thu a sawi a, kawmkar deuhah inthiarin hetah hian nau hi a sang chhuak ta a ni.

Nau a san chhuah takah chuan a kalpuitu chu nau hringtunu pawh hruai tel lovin Civil Hospital lamah a tlanchho nghal a, thil awmdan a han hrilh a, mahse Civil Hospital a duty te chuan khum a ruah loh thu leh an admit theih loh thu an hrilh a, hei vang hian a vel a lo awm te chuan lirthei remchang hmangin John Williams Hospital an pan nghal a, dar 3:30Pm-ah John Williams Hospital hi an thleng a ni. 

John Williams Hospital-ah hian Dr. Ramdinthara Sailo, Gyanae Doctor chu a lo awm lova, hun engemaw chen John Williams Hospital-ah hian an awm hnu in ral atangin Dr. Ramdinthara Sailo hian Civil Hospital-a Gyanae Doctor chu lo buaipui mai tur leh placenta pawh manual-a lo tihsak turin Phone-in a ngen sak a ni. Civil Hospital hi pan lehin tlai dar 5:30-ah Examination Bed-ah lo dawnsawn a ni. Civil Hospital an thlen hian a la harh a, a hnu reiloteah biak theih lovin a awm a, thisen Unit 2 an pe hman a, dar 6:35 Pm khan a thi tih puan (declared) a ni a, thihchhanah Sudden Cardiac Arrest (SCA) tih a ni.

Naute dinhmun: Nausen hi NBCU-ah dar 5:10 Pm-ah lo dawnsawn(received) a ni a, warming care tih nghal a ni a, mipa niin a pian a tha a, sucking a normal a, a lungphu pawh normal range niin Kg 2.700 a rit a ni a, fufe kim a piang a ni a, damdawiin an thlen hian a laihrui a lo bung tawh a, Nestogen pe in NBCU-ah hian tha taka enkawl a ni. NBCU-a duty leh maternity ward-a duty ten an tih tur tha takin an ti niin a lang.

Nau pian hun tur: F.Lallawmkimi hi April ni 17 hi a neih hun tur a chhut a ni a, Naute nu hian check-up hi routine tha takin a ti a, 40 weeks pai turah 35 weeks-ah nau hi zunin (toilet)-ah a cheh ta a ni. Amah hi nau awl chi niin an sawi a, tun tum hi a mipa 2 a paina a ni.