Aizawl: Mizoram district 8 zingah Aizawl district chu kum 1 hnuai lam nau thi (infant mortality rate) sanna ber a ni a. 2019 chhung khan Mizoram ah mitthi 6,606 an awm a. Hetih lai hian kum 11 chawhrualin birth rate a hniam zel rualin death rate a tlahniam lem lo thung.

Annual report of registration of births and deaths, Mizoram 2019 tarlan danin nikum chhunga Mizoram puma naute thihna thleng chu dama nau piang 1,000 zelah 13.31 a ni a, Aizawl district chu naute thihna tamna ber district a ni. Report tarlan danin Aizawl district-a IMR chu 18.14 niin a sang ber a, Mamit district chu a hniamna ber niin nau piang dam 1,000 zinga 0.55 chauh an thi nia tar lan a ni. Nausen thihna bikah hian khawpuia thi aiin thingtlanga thi an tlem zawk a, khawpuiah nau piang 1,000 zela 16.90 thi anga chhut anih laiin thingtlangah chuan 7.96 thi anga chhut a ni. Nau thi tam lamah Siaha district chuan Aizawl dawtin an district IMR chu 16.05 niin Champhai chu 14.01 ni lehin Serchhip 12.89-in a dawt a. Lunglei 11.44, Lawngtlai 8.72, Kolasib 7.18 leh Mamit 0.55 an ni.

Khawpui, a bikin Aizawl district-a nau thi an tam chhan hi hmun dang atanga nau nei turten Aizawl an pan nasat vang niin Economics & Statistics department thawktute chuan Zalen an hrilh a. “Aizawl hi damdawi in tha awmna hmun a ni a, thingtlang lam atanga pantu an tam avangin thi pawh an tam lo thei lo a. Aizawl district-a thite hi Aizawl district chhunga mi an ni kher lo a; mahse, an thihna hmun hi Aizawl a nih miau avangin Aizawl district anga tar lan tho a ngai thin a ni,” an ti.
Infant

Mortality Rate hi Mizoramah a tlahniam hret zela, 2009 khan 38.03 a nih laiin 2019-ah 13.31 a ni.

Hetihlai hian Mizoramah chawhrualin nau piang (birth rate) a tlakhniam hret hret laiin thihna (death rate) erawh a tlahniam lem lo thung. Kum 11 kalta chhunga Mizorama birth rate chu 2009-ah 22.88, 2010-ah 22.46, 2011-ah 22.89, 2012 ah 22.95, 2013 ah 21.20, 2014-ah 20.70, 2015-ah 20.48, 2016-ah 18.19, 2017-ah 16.96, 2018-ah 16.25 leh 2019-ah 18.05 te an ni.

Kum 11 kalta chhung veka death rate chu 2009-ah 5.33, 2010-ah 4.68, 2011-ah 4.94, 2012-ah 5.73, 2013-ah 5.28, 2014-ah 5.44, 2015-ah 5.32, 2016-ah 5.19, 2017-ah 4.90, 2018-ah 4.29 leh 2019-ah 5.01 te an ni.

Annual report of registration of births & deaths, Mizoram 2019 atanga a lan danin nikum chhung khan Mizoramah mitthi 6,606 awmin nau piang 23,808 an awm bawk. Nikum chhunga mitthite hi mipa 4,052 leh hmeichhia 2554 an ni a, mitthi zinga 3,388 hi damdawi in hrang hranga thi an niin nikum chhunga death rate hi 5.01 a ni. Nikum chhung vek khan Mizoramah nau piang 23,808 an awm bawk a, piang zinga 12,060 hi mipa an niin hmeichhia 11,748 an awm.

Nau piang zinga 17,333 hi damdawi in hrang hranga piang niin nikum chhunga birth rate hi 18.05 a ni. 2019 chhung hian nausen thi 317 leh thi saa piang (still birth) 83 an awm a. Kum tin Mizoramah naupiang hmeichhia aiin mipa an tam zawk zel a, hetih rual hian mitthi an pawh mipa chu a tam zawk an ni zel a. Mipa thi an tam chhan chu ruihhlo vanga thi an tam vang nia an hriat thu E&S an sawi.