- Dr. P.C.Lalramhluna (Tetea) M.S (Gynae), Civil Hospital, Aizawl Hmanni Civil Hospital Gynae-OPD a ka damlo en pakhat chu a thi put a reh thei miah lo a, a chhan ka han zawh chian chuan damdawi zuar pakhat hnen atangin nau tihtlakna damdawi leiin a naupai lai chu damdawi hmang a lo ei a, tihtlak theih a lo in beisei a ni awm e. Amaherawhchu, a naupai lai chu a tla famkim thei ta si lo va, a nunna thlengin a tawrh phah hlauhawm khawpin harsatna a neih phah ta a, a pawi hle a ni. Hetiang case hi hmun tam takah hmuh tur a awmin a rinawm a, case thenkhat phei chu thi lek lek deuhthawin damdawi inah an rawn inzawn a, thisen chhuah nasat avanga thisen nei tlem leh dâng lutuk (severe anaemia) leh shock (hypovolemic/hemorrhagic shock), damdawi in thlenpui lo se reilo te-a thi mai thei dinhmuna dingin damdawi in an lo thleng fo a ni. A tlangpuiin nau tihtlakna damdawi ei hian nau hi a tla fai mawh hle a, ziah fai a ngai deuh ngei ngei thin. Nau tihtlak hi a chhan a that viau loh chuan India ramah phal a ni lo a, nuin nau a lo paiin chhan tha tak (indication) hnuaiah chauh nau tihtlak phal a ni a, chu pawh chu qualified doctor-te enkawlna hnuaiah chauh tihtlak phal a ni. Tin, nau tihtlakna damdawite hi lo pawngpaw ei ngawt chi a ni hauh lo va, naupai lai upat dan (period of gestation) azirin a tihtlak dan tur protocol a awm thlap a , mahni duh dana lo ei ringawt khan nunna thlengin a tawrh phah thei a ni tih mipuiten kan hriat a ngai a, a chunga kan case sawi ang khian nau tihtlakna damdawi ei ve ringawtin tla kim thei si lo se, a tawpah damdawi in pan a ngai leh tho thin a; chuvangin, tumahin mahni thu emaw, miin a damdawi a awm an tih vang ringawtin nau tihtlakna damdawi ei lo hram turin mipuite kan ngen a che u.