Manchester United star Cristiano Ronaldo hi football khawvel-ah chuan mi hmingthang leh langsar ber tih ngam hial a tling a, he game hmuhnawm tak ti hmuhnawmtu player ropui ber pawla ngaih a ni.

A career chhungin Portuguese hian Ballon d’Or award panga a dawng tawh a, UEFA Champions League title panga a chawi tawh bawk a, European Championship-ah pawh chawimawina lian dang dawng nual tawhin league hrang hrangah a champion tawh bawk. 

Goal khung leh mimal record tam tak a nei a, heng zinga ṭhenkhat chu Champions League-a goal khung hnem ber (140), international goal khung hnem ber (115) a ni. Club leh ram tana goal khung zawng zawng (816) record a nei bawk.

Khelmual chhung leh pawna a thiltih ropui tak tak avangin Manchester United forward hi mi tam takin an ngaisang a, heng avang hian milar zingah social media platform hrang hranga fans ngah ber pawl a ni.

Footballer anga a hlawhtlinna piah lamah a mimal nun a invawn dan entawn tlak tak avangin amah ngaisangtu footballer thalai tam tak a nei.

An naupan deuh laia Ronaldo-a ngaisang em emtu footballer pathum kan thlir dawn a ni.

Antony Santos
Real Madrid star hlui ngaihsan em emtu pakhat chu Antony hi a ni. Brazilian leh  Ronaldo hi teammate an ni mek bawk.

Antony hian kumin nipui lai khan Ajax aṭangin Red Devils a zawm a, he thil thleng hian a idol nen locker room khata an hman dun theihna hun remchang a pe ta hlauh a ni. Brazilian hian Portuguese a khelh dan a la nasa nge ni, an khelh dan a inang hle a, ball a thiam em em a, a cherang bakah wing-ah awmin a khel thei bawk.
    Ajax star hlui hian Manchester United tan a khelh hmasak ber tumin hriatreng tlak goal a khung a, hemi tum hian Arsenal chu 3-1 in an hneh a ni. 

Erling Haaland
Erling Haaland hi tun dinhmunah Europe-a striker hot ber pakhat a ni mek. Norwegian hian kumin nipui bazarah Manchester City a pan a, Premier League-ah thlipui ang maiin a tleh mek a, golden boot intlansiakah hma hruaitu a ni mek bawk. Match sarih a khelh tawhah goal 11 zet a khung tawh.

Kum 2021-a interview a neih tumin Haaland chuan Ronaldo hi a ngaihsan thu leh a entawn thin thu a sawi a. Amah vanga tun dinhmun thlen phak ni hial a a inhriat thu a sawi. 

City striker Haaland hian goal a khung thei hle a, a idol hnung zuiin goal a thun chho mawlh mawlh a, engtik niah emaw chuan Ronaldo record pawh hi a la rawn khum hlawm maithei a ni.

Kylian Mbappe 

France international Kylian Mbappe hian Ronaldo-a ngaihsan em avangin hriat a hlawh phah hle a ni. A naupan lai atang tawhin Ronaldo hi a idol a ni a, tumkhat pawh a room banga a idol thlalak intar pakhat chu thlalak puiin social media-ah a pho chhuak a, chu a thlalakpui chu tudang nilovin Juventus forward hlui Ronaldo thlalak ngei a ni. 

Mbappe hi tun dinhmunah football player hlu leh tha ber pawl a ni mek. AS Monaco player hlui hi dribbling thiam leh tlan chak em em a ni a, goal a khung thei hle bawk. FIFA World Cup pawh chawi tawhin engtik niah emaw chuan Ballon d’Or chawimawina pawh a la dawng ngeiin a rinawm.