Aizawl: Zirtawpni kalta a Maria Vanlalhmangaihi (3) leh a u Mary Lalremruati (6), Kawldingliana fanu Chhingchhip Venghlun thattu a puh Lalchhantluanga (18) s/o Malsawmi chu nizan dar 7 rikhma deuh khan Chhingchhip Venghlun a in 1 atangin man a ni a, mipui kut a tuar nual a, he chanchin buatsaih lai hian Police kutah a awm tawh. Zalen thudawn danin Maria leh Mary te nu leh pa te hi Tuikum bula lo ah an riak a, an fanu upa ber dawttu Priscilla Vanlaltleipuii (18) hovin inah hian an awm a. Vanlaltleipuii hi a nu leh pa pui tura a feh duh avangin a naute hi a pu te ina awm turin a hrilh a, tlaia a feh haw chuan a hmuh mai loh avangin leh a pu te inah hian an kal bawk si loh avangin chhung leh khat inpunin an zawng a. Khawtlang an pun hnu zan dar 8:30 velah an unau ruang hi an kawmthlangah hmuh a ni a, a u zawk Mary hi ruak vekin an hmu a, a nau zawk Maria hi cement bag ruakah dah a niin an pahnih hian hliam nasa tak an tuar ve ve a ni. He thilthleng hi Police hriattir nghal a niin Serchhip SP leh a hoten Chhingchhip khua hi an thutchilh nghal a, thil awmdan enfiahin pawik hawihtu man tumin theihtawp an chhuah nghal. He tualthihna ah hian Lalchhantluanga (18) s/o Malsawmi, Chhingchhip chu rinhlelh a ni a, a thawmhnaw thenkhat chu pawikhawihna hmunah hian hmuh a ni. Vanduaina tawk naupang pahnih te ruang hi nimin khan Chhingchhip damdawi inah post mortem a ni a, nizan khan vui an ni. Mizoram State Child Protection Society, Serchhip district a Probation Officer chuan tualthattu a puh hi nu leh pa kar loa piang, a pa in a duhloh leh a pu in a enkawl a ni a, a enkawltu a pu hi a thih vangin ramhnuai leh hmun remchang laiah a riak mai mai thin niin a sawi a. Tun hnai thla 2/1-ah kum 18 hi a tling chauh niin a sawi bawk.