Aizawl; Social Welfare Department hnuaia State Adoption Resource Agency (SARA) kaltlangin Mizoram naupang 224 chu dan angin fa atan lak (adopt) an ni tawh a, heng zinga 207 hi India ram chhung a mite lak a niin a dang 17 hi India ram pawn a mite lak an ni. Dan anga naupang lak zinga 111 hi mipa an ni a, hmeichhia 113 an awm bawk. India ram chhung bikah chuan hmeichhia hi 104 niin mipa naupang 103 an ni a, India ram pawn ah chuan hmeichhia 7 lak an ni tawh a, mipa 10 an awm bawk. India ram pawn (inter country) a latute hi America, France, Spain, Germany leh Norway te an ni. State Adoption Resource Agency (SARA) Nodal Officer Zodin-thangi chuan naupang lak dawnin fimkhur takin thil an ti thin tih a sawi a. Fa la duh nazawng hnenah an lak tir lo nia sawiin an chhung-kaw chanchin, an hrisel-na, sum lakluh, an in enkawl dan leh thildangte an zirchian hnuah 'fit' nia hriat te hnenah chauh an laktir tih sawiin naupang an lak hnuah pawh an khawsak dan an vilzui zel tih a sawi. Zalen palai zawhna chhangin Zodinthangi chuan nu leh pa neilo (fahrah) te chu home a dah ai chuan an chhungten enkawl se emaw fa atan lak nise a tha ber tih sawiin, "Home ah chuan engkim an neneralise lo thei lo a, routine angin an kal a, an talent neih ang ang pawh an lantir theihloh bakah hmangaihna/duatna an dawng tak tak thei lo a, chuvangin home a indah hi pumpelh hram kan duh a ni," a ti. State Adoption Resource Agency (SARA) thawktute chuan naupang la duh an tam tih sawiin mamawh ang an pe phaklo tih Zalen palai an hrilh a. Fa latute chu a tlangpuiin ramdang (foreign) a mite chu thiltha tih duh vang leh naupang tanpui duh vang a ni tlangpui a. Ram chhunga mite chu fa it vang a ni tlangpui tih an sawi bawk. SARA thawktute chuan Mizoram chu a mihring cheng ngaihtuahin fahrah, home a dah tamna a ni an ti a. Zo hnahthlak dik tak zingah chuan home a indah hi awm ve tho mahse a tlangpuiin Mizoram chhunga hnam tenau leh kan thenawm hnam zingah home a indah an tam tih an sawi bawk.