ZALEN October 18, 2024 : Directorate of School Education chuan thuchhuah siamin Mizorama Primary School leh Middle School ten Chawchhun sem thin 18.10.2024 atanga an chhunzawm theih tawh loh tur thu an thlen chu an dinhmun an hriatthiampuiin pawi an tih thu an tarlang a, thawktu ten naupangte dinhmun hre renga mahni zawn theuha tlawmngaih chhuaha a theih ang anga thahnemngai taka hma la chhunzawm zel turin an inngen.

Education Department chuan chawhmeh man (Material Cost) hi kumin January thla atanga tun thlenga pek chhuah a nih loh vang a ni ber a, Cook-cum-Helper hlawh pawh thla 4 lai chu pek a ni tawh lo a, pawi an tih thu an tarlang. Sawrkar thar-in Cook- cum- Helper te dinhmun hria a, thlakhata Rs. 1500 an hlawh thin chu Rs. 3000-ah tih san a nih thu leh hemi ang hian April leh May thla hi pek a ni tawh an ti.

Fund pek chhuah dan system thar PFMS (Public Financial Management System) hman a ni chu an buaina ber niin an tarlang a, chumi hnuaiah chuan SLS (State Link Scheme) awm lehin Account pathum hawn a ni a, chu chu a hran theuhin Finance Department, PFMS leh State Treasury leh Central lama PFMS te nen inthlunzawm vek a ngai a, hemi buaipui chhung hian hun a heh tih chu an chhuanlan ber a ni.

PFMS hi thil thar a la nih avangin State PFMS-a thawktute nen inbe rawnin inhai kuak chawp zel a ngai an ti a, heng zawng zawngte zawh a nih hnuah Central Assistance dilna hi thehluh theih a ni chauh a, kum 2023-24 atana 1st Installment pawh October thla laihawl velah hmuh theih chauh a nih tu thu an tarlang.

PFMS chu langtlang taka kalpui a nih avangin fund kal dan hi Central lamin an rawn hmu vek thei tawh a, fund neih zawng zawng atanga 75% tal kan hman zawh loh chuan Installment dang dil theih a ni lo an ti. Central-in fund a rawn release veleh theih tawpa umzui a ni chung pawhin an duh angin hmalak a har tiin, hetianga thil tih zung zung theih loh a nih dan hi School-a an thawhpui zirtirtute leh Zoram mipuiten hriatthiampui an ngai an ti.