Aizawl: India Republic day (January ni 26,2018) hian Mizo naupang pahnihte chuan New Delhi ah huaisen lawmman an dawng dawn. Mizo naupang huaisen lawmman dawngturte hi F.Lalchhandama (17) s/o F.Lalmalsawma, Tuikual South leh Zonuntluanga (16) s/o K.Lalthanpuia, Sialhau khua te an ni. F.Lalchhandama hi a boral avangin a aiawhin a chhungten lawmman hi an dawng ang a, Zonuntluanga erawh lawmman la tur hian a kal thei a ni. January 16, 2018 khan Delhi-ah thlengin January 26, 2018 zanah Delhi an chhuahsan leh ang. F.Lalchhandama hian May 7, 2017 khan Tlawng luia tuicheng a thianpa chhan a tumna lamah a nunna a chan a ni. Zonuntluanga leh a pa K.Lalthanpuia hi August 20, 2016 khan an khaw bulah savawmin an pafain a beia, a pa chu a chhan a ni.