Aizawl: August, 2016 a Ministry of Women & Child Development Minister Maneka Sanjay Gandhi in a hawn Protection of Children from Sexual Offenses (POCSO) e-box chu hmang tangkai turin Mizoram Social Welfare Department (SWD) chuan mipui te a ngen. POCSO e-box hi internet hmanga awlsam taka mipat hmeichhiatna leh thildanga khuaikhem tawk naupang ten complain an thehluhna tur a ni a. Police a kal kher ngai lo pawhin report thehluh a nih chuan action lak zel a ni dawn niin Mizoram SWD chuan Zalen palai a hrilh a ni. Social Welfare Department Joint Director, Laldikkimi chuan POCSO e-box chu mipui te’n an hman tangkai a ngaih thu sawiin, “Tun thleng hian Mizo mipui hmang kan la awm hriat a ni lo a, thil thar a ni a, in hrilh darha lo hmang tangkai turin mipui te kan in ngenin kan in hriattir a ni,” a ti. POCSO e-box hi NCPCR website ah awmin awlsam taka internet-a hmuh mai theih a ni a, mawlmang thei ang bera mitin hriatthiam theih tur leh hman thiam theih tura siam a ni. Khuaikhemna tuartu naupangin emaw report sak theitu puitlingin report a thehlut thei a. Naupang te leh a complain saktute nihna thup tlat a nih tur thu thudawnna chuan a sawi a. Report lut a awm chuan a rang thei ang berin State Social Welfare Department in action a la ang a, central lamah Women & Child Development lamin an lo vil reng niin Mizoram SWD chuan Zalen palai a hrilh bawk. POCSO e-box hi ncpcr.gov.in ah emaw Google ah ‘POCSO e-box’ tih zawngin awlsam takin report thehluh duh tan a hman theih a ni.