Aizawl: Khawlaia naupang thil zuar chu Social Welfare department-in enzuiin chhawr luih an hmu lo niin ZALEN an hrilh.   Department atanga thudawn danin naupang thil zuarte hi chawlh lai leh school bana zuar an ni tlangpui a. Chhungkaw harsat avangin sumtuak nan an hmang a, chhawrluih an nih loh tlangpui avangin danin a khap, ‘child labour’ hnuaia rin luh theih a ni lo a, dan anga action han lak theih dan tur vak a awm lo niin department hotute chuan an sawi a ni.   Naupangte hi an inah te kalin chhui zui an ni a, an chhungkaw dinhmun thlenga chhuiin department hotute chuan chhungkaw harsa an ni tlangpui tih an sawi a. Harsa lutuk ang chi chu bawhzuiin sikul an bansan loh nan leh home-a awm a ngaih loh nan an sponsor thin thu an sawi bawk. “School kal hun lai (school hour) a thil zuar hmu an awm chuan an rawn complain thin,” tiin department hotute chuan ZALEN palai an hrilh a, a tul anga an chhui zui zel thu an sawi.   Naupangte hi a then a huhoa zuar an awm a, bazar-a mi an la a, an zawrh kual hnuah an hlawh an insem leh thin, mimal leh pahniha zuarte pawh an awm thin bawk a ni.