Aizawl: Social Welfare department chuan tunlaia naupang thil zuar hluar deuh chu an chhui mek tih Zalen an hrilh a, thudawn danin tunlai hian bazar leh hmun hrang hrangah naupang thei tui leh thil dang zuar an tam hle.   Naupangte thil zawrh chhan hriat a ni chiah lo na a, chhungkaw harsatna chhuanlama zuar an tam hle a. Naupang thenkhat thei tui zuar thinin an insawi dan chuan an chhungkaw harsatna avang te, an nu emaw an pa a damloh avang te leh chhan dang avangin an sikul bânah an thil an zuar thin niin an sawi a ni.   Heng naupang te hi danin a hnathawk thei tura a phut kum 14 hnuai lam, naupang tak tak an ni a. Naupang pakhat chuan a pi hoa an awm avangin pawisa tuak nan a zuar niin a sawi bawk. Heng naupangte hian bazar atangin theitui hi an la niin an sawi a, tlaiah a huhoa zuar an nih chuan an hlawh an insem leh mai thin niin an sawi.   Social Welfare department Director Laldikkimi chuan an department-in an chhui mek tih a sawi a. An intihhmuh chhoh a hlauhawm thu a sawi.   India ram chhungah chuan naupang hnathawka chhawr hi danin a phal lo a, Child Labour (Prohibition & Regulation) Act, 1986 hnuaiah chuan kum 14 la tling lo hnathawka chhawrte chu ‘child labour’ tih an ni a, hei hi danin a khap tlat a ni.   Thudawnna pakhat chuan heng naupangte hi chhawr luih chu an ang lo tih Zalen a hrilh a, chhui chian ngai tak erawh a nih thu a sawi bawk.