Aizawl October 2, 2022 : Nimin khan Zonuam Branch MHIP huaihawtin, ‘Naute pawngsual thlavang hauhna kawng zawh’ neih a ni a, kawngzawhte chuan ‘Naupang khawngaihthlak tak pawngsualtu hi a rang thei ang ber a man chhuaha a phutawk hremna pek kan phut,’ tih resolution an pass.

Zonuam veng chhunga kawng zawhah hian an veng chhung mipui leh veng pawn lam atanga tawiawmtu mi thahnem tak an tel a. Kawngzawhna a thusawitu, Zonuam MHIP hruaitu, YMA hruaitu leh Local Council hruaitute chuan pawikhawihtu chu police leh dan kengkawhtuten an man chhuah ngei an phut thu te, hmeichhe chak lo zawk chunga hursualna thleng chu an do thu te an sawi a, hmeichhe zalenna tichhe zawnga chetna do zel a tul thu te an sawi.

An khawtlang hun tawn mek chu hrehawm an tih rualin Zonuam khawtlangin police-te an ringtawk tih khawtlang hruaitute chuan sawi bawkin, “Kan rintawkna che u min tihhlawhtlinsak turin kan ngen che u a, khawtlang leh Mizo dana pawikhawihtu man chhuah a ngaih hma ngeia pawikhawihtu man chhuak turin kan ngen che u a ni,” an ti bawk.

Zonuam khawtlangin an duh ber chu, rawng taka naupang pawngsualtu man chhuah a nih thu te, sawrkar thuneitute pawh police-te kut phuarsak lo tura an beisei thu te Zonuam khawtlang hruaitute chuan an sawi.

September 16, 2022 zan dar 11:25-a thi, Zonuam venga hmeichhe naute pakhat chu pawngsual nia hriat a nih chungchangah doctor-te report atangin police-ten thubuai an ziak lut tawh a, hemi chungchangah vek hian social activist Vanramchhuangi, Chaltlang pawhin September 29, 2022 khan Zonuam Police Station-ah first information report (FIR) a thehlut bawk.

Kawngzawhtute au hla

# Kan veng chhunga naupang pawngsualna rapthlak tak thleng hi kan duh lo.

# Naupang kumtlinglo pawngsualtu hi man chhuah vat ni rawh se.

# Pawngsualtu man chhuah vat a nih theih nan theihtawp kan chhuah zel ang.

# Mipuiten duh thuhmun pakhat chiah kan nei, naupang pawngsualtu man chhuah.