DOWNLOAD OUR APP

Read latest news on your phone
app-store

Naute thihna ah 'sexual assault' a awm ngei - Police; Naute nu leh pa police in man tawh

Oct 04, 2022

POLICE PRESS STATEMENT: He naupang khawngaihthlak takin rorelna dik a hmuh ngei theihna'n mipuite tanpuina kan dil a, a chhuichhuahna kawnga min pui thei tur pawimawh hria kan lo awm a nih chuan rang taka police te min hrilh hre vat turin mipuite kan ngen tak meuh meuh a, police hnena thu thlentute thup tlat an ni ang.

October 4, 2022; Mizoram police chuan thuchhuah siamin, tunhnaia Aizawl veng pakhata hmeichhe naupang kum 2 leh thla 5 mi chunga hursualna thleng nia rinhlelh chungchangah sexual assault awm ngeiin a lang tih tarlangin, naute pa chu October ni 1, 2022 khan man a nih thu leh October ni 3, 2022 ah chiang zawka thu zawhfiah turin naute nu man a nih thu an tarlang.

Mizoram police in vawiin a press statement an siama tarlan a nih danin, ni 17.9.2022 zing dar 12:15 khan Vaivakawn PS chuan medical officer, Ebenezer hospital atangin telephone kaltlangin, an damdawiin ah hmeichhe naupang kum 2 leh thla 5 mi chu a boral a, a ruang an sawngbawl laiin a kap bawrah thil pangngai lo nia rinhlelh hmuh a nih thu leh mipa-hmeichhiatna hmansual kaihhnawih a nih theih thu report dawn a ni a, police party intirh nghal niin, a ruang endik a ni.

Hemi ni vek hian naute ruang chu medical officer, civil hospital, Aizawl ah endik tura thawn a ni a, doctor 2, Gynaecologist leh Forensic Medicine & Taxicology doctor ten uluk takin an endik a, hetah hian naute kap bawrah thil pangngai lo nia rinhlelh hmuh a nih thu leh mipat-hmeichhiatna hmansual kaihhnawih a nih theih thu an sawi. Hemi a nih avang hian enquiry officer SI Lalsangbera Sailo, in-charge Zonuam Outpost chuan he naupang hi hursualna thil a khawihchhiat ni theia alan avangin Officer -in-charge, All Women Police Station ah enquiry report a submit a, uluk taka chhui turin thubuai ziahluh a ni.

Naute thih chhan chu doctor te hmu dan chuan thawkna kawng vung/Acute Laryngotracheobrontist (ALTB) with severe respiratory distress niin an sawi a, doctor te sawi danin a chunga mipat-hmeichhiatna thil thleng nia lang nen inzawmna nei lo nia hriat a ni.

He thil thleng hi a tir atangin uluk takin chhuizui a ni a, a chenpui, a nu leh pa pawh vawi tam thuzawh tawh an ni. An inchung chiah a cheng naute boral pi leh pu te, a ni leh naute patea te nupa pawh vawi tam tak thuzawh an ni tawh a, hemi bakah hian thenawm khawveng leh hmun hrang hranga an chhungkaw chanchin hre deuh te, khawtlang hruaitu thenkhat bakah Ebenezer hospital thawktu engemawzat kawm an ni tawh bawk.

Naute taksa atangin Vaginal Swab leh Anal Swab lain FSL ah thawn nghal a ni a, amaherawhchu ni 28.9.2022 a report dawnah 'semen' hmuh a nih loh thu dawn a ni.

Police te chuan he thubuai chhuichhuak tur senior officer te kaihhruaina leh enpuina hnuaiah theihtawp an chhuah a, he naupang taksa hliam enin 'sexual assault' awm ngeiin a lang a, chutihrualin naute nu leh pa te police ten an kawmna atangin anmahni bak chu amah enkawl a, hetiang thil ti tur khawpa lo khawih ve dang an awm theia a lan loh avangin rinhlelhawm ber (prime suspect) an ni lo thei lo a ni. Chuvangin, naute pa chu ni 1.10.2022 khan man niin, naute nu chu 3.10.2022 khan chiang zawk a thu zawhfiah turin man a ni ve leh a ni.

Share now