ZALEN June 10, 2026 ; Sport Minister Lalnghinglova Hmar chuan vawiin khan a pisa-ah Nazareth Lalthazuala Phuaibuang khua, June 5-a One Championship Friday Night Fight, Bangkoka neiha chiang taka hnehna changtu chu lawmpuina hun a hman a ni.

Lalnghinglova Hmar chuan thusawiin, "Nazareth Lalthazuala hi December Ni 5-ah khan One Championship-ah hnehna a chan avangin lawmpuina hun ka pisa-ah kan lo nei tawh a, tunah hian a aia thleng sang zawkin lawmpuina hun kan hmang leh thei hi a lawmawm tak zet a ni. Nimin lamah MuayThai leh Arm Wrestling lama medal la te lawmpuina hun kan hmang a, amah Nazareth-a leh Mizoram State Mixed Martial Art Association te nen kan inbe pawp reng a, vawiina lawmpuina hun pawh hi anni ho nena kan ruahman a ni," a ti.

Sports Minister chuan, "Tunah chuan Nazareth-a hi mi aia chungah a lo awm ta a, mi hriat hlawh a lo ni tawh bawk a, a hmaa ai khan a invawn uluk leh zual a ngai sauh dawn a ni. Mizoram State Sport Council-ah MISMA hi affiliated an la ni lova, tehna hrang hrang a awm a, anni ho affilliate theih lohna chhan leh a rem chan lohna hi a remchanna lam zawk kha kan thlir tur a ni. Vawiina Nazareth-a kan chawimawina hian kum lama la naupang zawkte fuih thar se, Nazareth-a taimakna leh huaisenna hian thangthar zawkte cho chhuak se ka duh a ni," a ti.

Tetea chuan, "India ramin 2036-ah Olympic thlen tumin hma kan la mek a, Zofate pawh Olympic-ah kan tel ngei theihna turin nasa takin hma kan la mek a, Mizoram atangin mi 2 chiah Olympic-ah kan la tel thei a ni. Mizote theihna lam hawi Combat Sport lam kan thlur bing deuh bik a, chumi atan chuan NESIDS (ORTRI) atangin cheng vaibelchhe 38.4 kan hmu tawh a, sport discipline pakhat hmingin a kal a ngai si a, Boxing Center of Excellent Aizawl-ah kan din dawn a ni. Boxing chauh ni lovin Combat Sport huang chhunga mi te a leng vek deuh vek turah kan ngai a ni," a ti.

He hunah hian MISMA Honorary President leh MLA ni bawk Lt. Col. Lalhmingthanga, MLA Adviser to CM Lalmuanpuia Punte, S.Tuipui Bialtu MLA Jeje Lalpekhlua bakah Sport Department hotute leh MISMA hruaitu mi thahnem tak an tel a, Sport Minister Lalnghinglova Hmar leh Sport & Youth Service ten lawmpuina thilpek an pe a ni.