Mizoram chu India ram pumah rawlthar kum 14 hnuai lam zinga basketball thiam ber an ni leh ta a. Final-ah Uttar Pradesh chu 63-38-a sawpin nomawi an la a, an khel a hmuhin NBA Indian Academy-a technical director meuh pawhin a fak.

Nilaini tlaia Puducherry-a 48th Sub Junior National Basketball Championship khelh zawh takah champion lai, Mizoram hian group stage-a an lo hneh tawh, Uttar Pradesh hi an hneh nawn leh a, an inhmachhawn hmasak aiin an hnehsawh zawk bawk.

Mizoram rawlthar rualte hian group stage-ah khan Uttar Pradesh hi 74-63-in an lo hneh tawh a, semifinal thlenga an hmachhawn state panga zingah an sawp loh ber leh hneh teuh bertu an ni a. Final-ah erawh Mizo rawlthar thaza rualin an dah ‘nil’ veleh ta tho a ni.

Final an khelh dan chungchangah head coach Marc Lalthlamuana Sailo (Tetea) chuan an tumpuite hi an inkhelh hmasak aiin an zawi a, anni pawh an zawi phah ve lek lek tih a sawi a. “Champion kha kan tum ber a ni a, theihtawp chhuahin kan bei a, kan naute an zawi deuh pawhin anni (Uttar Pradesh) ang ni ve lo turin kan infuih nasa hle,” a ti.

A zawna vawi thum nana Mizoram champion-puitu coach chuan Pathian zar liau liau a nih thu a sawi a, “Rang takin kan khel a, kan speed tha hi kan champion-pui a ni,” a ti a. Final khelh hma zanah player pakhat nuamsam lo nei mah se an khel kim thei ta tho tih a sawi bawk.

Mizoram khel rang tak leh player-te fitness a hmuh hian NBA India Academy boss Scott Flemming-a pawhin hmuhnawm tiin a fak zui a, “Nangni chu inkhel a rang tha a, a tough bawk a, in hmuhnawmin a tha tak zet,” tiin a sawi tih Mizoram coach hian a sawi.

Flemming-a hian Mizoram khel hi hmuhnawm a ti bawk a, an khelh hnuhnung vawi thum chu a hmunah a en ve ziah a ni.

NBA Academy India hi India rama basketball training center tha ber niin Delhi-a Jaypee Greens Integrated Sports Complex-a awm a ni a. Technical Director Flemming-a hi India mipa team pawh lo enkawl tawh niin NBA Coach of the Year Del Harris-a hnuaiah pawh a lo thawk tawh a. Mount Vernon Nazarene University-a mipa team a enkawl laiin National Coach of the Year chawimawina vawi hnih a lo dawng tawh bawk.

Mizoram hian tun inelnaah hian cho phak an tawng lo tluan zak a, group stage-a an tumpui an hneh vek hnuah knockt out stage lut zinga a titha ber an nih avangin pre-quarterfinal pawh khelh hah ngai lovin quarterfinal an lut.

Quarterfinal-ah hian Jharkhand rawlthar rualte lakah player mal fak bik tur pawh awm lovin team game tha tak khelin 72-30-in an sawp leh a, harsa lo takin semifinal an lut a. Final lut tur hian nikum final-a an lo hneh tawh, Haryana chu 69-40-in an hneh leh bawk a ni.

Ningania Puducherry-a inelna tanah hian a tir lamah Mizoram player 12 zingah damsam lo an awm nual a. An khelh hmasak bera Maharashtra an hmachhawn tum phei chuan dan pangngaia player 10 tal inkhel thei awm turah pariat chauh an awm a, a hnu lamah erawh harsatna an nei zui lutuk tawh lo thung.

Mizoram hian champion nomawi bakah Rs. 3,00,000 leh medal an dawng a. Basketball Federation of India President Aadhav Arjuna chuan lawmpui nan Kolkata atanga Aizawl inkara an thlawh hawna tur a tumsak dawn a, player-te chu pheikhawk (Nike) a pe vek dawn bawk a ni.

Sub Junior National Basketball Championship hi Basketball Federation of India (BFI)-in state hrang hranga kum 14 hnuai lam, hmeichhia leh mipa inelna atana a buatsaih thin a ni a. Kuminah hian Puducherry-in thlengin Mizoram hian mipa team a tir a. Mipaah team 27 inlanin hmeichhiaah 25 an inlan thung.

MIZORAM TEAM:
Player:
1. Samuel Vanlalpeka, Kulikawn West
2. B Lalruattluanga, Tuikual South
3. Emmanuel Lalpekhlua, Republic Veng
4. Stephen C Lalhruaitluanga, Aizawl Venglai
5. Jacob C Vanlalruatdika, Khatla South
6. Ronie Vanlalawmpuia, Bungkawn
7. Joel Lalbiakhlua, Khatla South
8. K Lalsangzela, Zarkawt
9. PC Lalruatfela, Dawrpui Vengthar
10. Reagan Zohmingsanga, Mission Veng
11. Lalrinchhana, Kulikawn West
12. C Lalfakzuala, ITI Veng

Manager: Raymond Lalengkima, Khatla South
Head coach: Marc Lalthlamuana Sailo, Zarkawt
Assistant coach: Z.D Denghmingliana, Kanan veng