Aizawl; Nimin khan Guwahati a Hotel Radisson Blu ah DoNER Minister Gen.V.K. Singh hovin North Eastern Region Infrastructure Conclave, 2014 neih a ni a, he hunah hian Chief Minister Lal Thanhawla chuan hmarchhak bial leh Mizoram mamawhte a thlen. CM chuan NE bial chu history leh a awmna avangin hun rei tak ata ngaihthah niin a sawi a. "Hmasawnna awm turin a ruhrel pawimawh, infrastructure facilities din angaih thu vawi duailo national leh regional level ah te sawi anih bakah, committee leh task force te, Shukla Commission te, Yugandhar Committee Report te, Mukherjee Task Force te dinin rawtna tha tak tak an siam a, mahse a taka bawhzui a ni thin lo a ni," a ti a. DoNER Ministry pawhin NE Vision : 2020 pawh a duan thu sawiin, "rawtna kan siam turte hi thamral tir mai loa, a taka bawhzui anih ngeina turin PHD Chamber of Commerce and Industry hian hma la turin ka ngen nghal a ni," a ti. Chief Minister chuan khawmpui thupui ‘Power Sector in N.E.Region : Challenges and Way Forward’ tih chu power siamna, a bikin hydro power siam chhuahna hmarchhak bial hian a ngah a ni a ti a. Power telloin hmasawnna a awm theilo tiin, rampuma power siam theihzat hmarchhak bial hian 40% (63,000MW) vel a nei a. Mahse 3% vel chauh siam chhuah anih avangin power ah kan hnufum hle a, hmasawn tur angin kan sawn theilo ni a ti a. Mizoramah phei chuan a mamawh ang a hmu phalo hle nia sawiin Power sector a private investment a awm theih nan Viability Gap Funding guidelines te chu herrem awlsam tura siam nise tiin a rawt bawk. CM Hawla chuan Ministry of New & Renewable Energy pawhin power siamah phurpui se a duh tih sawiin Power thawnchhuah leh sem chungchanga harsatna awmte pawh a sutkian dan central sorkarin enpui se a duh thu a sawi bawk a. Hmarchhak biala hmasawnna project duan reng reng chu ram leilung awmdan a zira a tehfung pawh siam ni thin se, tlangram leh phai te chu tehfung inang a hman kawp theih loh a ni a ti a. A tlangpui thu ah central sorkar in hmarchhak biala hmasawnna project te chu a dah pawimawh tawk loa a hriat thu a sawi a. Kolodyne HEP 460 MW pechhuak thei tur siam tura NTPC leh Mizoram sorkarin MoU an ziah tawh hnu kum 6 a liam hnu pawhin engmah hmalakna a awm lo a ni a ti. Conclave ah hian hmarchhak state Chief Minister te bakah Union Minister engemawzah an tel bawk a ni.