Mumbai-a North East Film Festival 2023 neih zawh takah Mizo film siamtute an che tha a, Napoleoon ZR Thanga leh Joshy Joseph te chuan Silver leh Gold Award an dawng. 

North East Film Festival 2023 hi March 24-26, 2023 chhung khan Mumbai-ah neih a ni a, Esther Hnamte chanchin tarlanna Napoleoon ZR Thanga siam 'A Star Is Born' chuan Best Documentary (Silver) Award a dawng. Joshy Joseph film siam 'Mizo Soundscapes' chuan Best Documentary Film (Gold) a dawng bawk - an che tha tih loh rual a ni lo.  

Mizo naupang zaithiam Esther Hnamte chanchin hian ngaihven a hlawh a, Mizoram mai bakah India ramah pawh ngaihventu a ngah hle. A chanchin tarlanna documentary siamtu Napoleoon ZR Thanga hian Bollywood hranghlui Poonam Dillon leh Manipuri filmstar Lin Laisram te hnen atangin award hi a dawng nghe nghe a ni.