ZALEN, January 21, 2026: Kohima Press Club-in kum 25 tlin denchhena Hmarchhak State Chanchinbu mite Inkhawmpui (NE Media Conclave)-ah Mizoram atangin ZALEN editor, Vanlalrema chu speaker-ah tangin hun a hmang.

Thawhlehnia Kohima Capital Convention Centre, Kohima, Nagaland-a neih inkhawmpuiah hian ‘Reimagining Truth: Northeast Journalism for a Changing World’ tih thupui hman a ni a. ‘Journalism as peace work: Navigating divides, building bridges & a strong media ecosystem for Northeast’ tih thupui sawihonaah ZALEN editor hi thupui sawitu zingah a tel a ni.

Vanlalrema Vantawl chuan Mizoram ram buai laiin peace journalism lo awm tawh ni se Mizoram chu kum 20 chhung a buai kher a rin loh thu a sawi a. Kum 2021-ah Assam leh Mizoram police inkah tum pawhin national media tam takin tan bik nei lovin reporting an pek tlangpui tawh thu a sawi bawk.

“Peace journalism chuan buaina chhuak chu a thup kher a ngai lo a, boruak tisosang zawngin a ziaktuin a ziah loh erawh a mawhphurhna niin media ethics pawimawh tak a ni,” a ti a. Hemi kawngah hian Mizoram Journalists’ Association (MJA) pawhin Mizoramah chuan a tul dan azirin an che chhuak thin tih a sawi.

Kum 2021 atangin Mizoramin raltlan sing tel a dawnsawna enkawl leh chhawmdawl kawngah sawrkar bakah tlawmngai pawl liante leh kohhranten hna an thawh thatzia a sawi a, mipuiten raltlan dinhmun an hriatthiam theih nan chanchinbu miten uar taka an chhuah a sawi fiah bawk.

Tunlai media tana chona lian tak chu raltlante leh Mizo mipuite inkarah boruak tha lo a awm lohna tura thu ziah thiam a tul thu a sawi a. Mizorama media mite, a bikin new media luhchilhte chuan peace journalism-ah zirtir leh kaihhruai an mamawh thu a sawi bawk.

NE Media Conclave-ah hian chanchinbu mi 100 vel an kalkhawm a, Mizoram atang hian ZALEN editor bakah Andrew Lalremsanga, DD News an tel. 

Conclave hawnna inkhawmah Kohima Press Club President Alice Yhoshu chuan kum 25 an tlin thlenga chanchinbu miten thawhhona tha tak an nei thei chu lawmawm a tih thu a sawi.

Khual zahawm, Press Club of India-a hmeichhe president hmasa ber ni mek, Sangeeta Barooah Pisharoty chuan, “Hmarchhak tual chhung media-te darh zau lo mah se a taka hmarchhak chanchin thar chenchilhtute an nih vangin dah hniam chi an ni lo,” a ti a. Thu dik hai chhuah kawngah a lan dan mai duh tawk lova thuk zawka an luhchilh a tul thu a sawi bawk.

A kharna hun hmanpuitu, Nagaland Chief Minister Dr Neiphu Rio chuan sawrkar leh media-te thawhhona tha neih a duh thu a sawi bawk.