Aizawl; Khawpui ek, zun leh thli chhe dang mumal zawka sawngbawl a nih theih nan thli chhe paihna ‘sewerage line’ siam hna chu Aizawl veng bit laiah tan a ni tawh a, hnathawkte harsatna siam loa thlawp turin SIPMIU Projrct Director chuan mipui a ngen tih ZALEN a hrilh a ni. “Zone 9 ah Aizawl hi then a ni a, tunah hian Zone 1 na huam chhung Republic, Electric leh Venghlui ah khur (trench) laih mek a ni a, primary sewerage (pipe lian ber) leh secondary (pipe laihawl) siam leh phum mek a in a. ‘Secondary sewerage line’ te chu feet 4 a thukah hmun hran hranah phum an ni tan tawh a, heng hian sewerage line lian ber ‘primary line’ a zawm anga, Chite kamah inbun chhuakin helai hmunah hian khawpui thli chu khawl lian tak hmangin tih thianghlim a ni dawn a ni,” tiin Er. Valbuanga chuan a sawi. Thli luanna lian ber ‘primary line’ hian Aizawl chu lei hnuaiah a hawlh tlang dawn a, ‘line’ te zawk ‘secondary line’ te chuan hmun engnge zah atangin an fin ang a, “ Zone 1 in a huam chin venga chengte chuan an chenna in atangin pipe in connection an la thei ang,” tiin SIPMIU hotu chuan Zalen a hrilh bawk. Bethlehem Chite kama thli luan khawmna tur hmunah a sawngbawlna tur khawl bun mek a a ni bawk a, C Technology hmangin fim kaka tihthianghlim tum a ni. Thli khal chu leithaah chan tirin hralh tum a ni a, thli tihthianghlim zawh chu thil dangah hman tum a ni tih thulakna chuan a tarlang bawk. “Hnathawk hi 50% Mizo lak kan tum a ni a, mahse tam tak chu an duh hunah chhuanlam siamin an chawl leh mai thin a, kan tan harsatna a siam a. Mipui hian kan hnathawh hi ro tling a ni tih hriain tibuai loin pui thei se kan duh hle,” tiin Er. Valbuanga chuan ZALEN a hrilh bawk a ni.