North East Zone Inter State Badminton Championships 2024-ah Mizoram chuan team event pali zingah final lutin pakhatah an champion a, a dang pahnihah silver medal an la bawk a. Champion Mizoram Junior Boy’s Team chuan kum tawp lama India ram puma zone inelnaah North East Zone ai an awh zui ang.

Hmarchhaka roreltu Mizo rawltharte

Boy’s Team Championship-ah hian Mizo rawltharten champion nomawi an la a, NE Zone Inter-state Badminton Championship-ah a vawi khat nan gold medal an la.

November thla hian Bhubaneswar, Odisha-ah 46th Junior National Badminton Championship-a Team event-ah hmarchhak aiawhin an inlan zui ang a, Mizoram badminton chanchina bung thar leh rahbi thar kaipuitute an ni.

Mizo rawltharte hian first round-ah Meghalaya an hneh hnuin semifinal-ah Manipur an hneh leh a. Final-ah Assam nen insuin 2-0-in an hneh.

Final-ah Mizoram tan H. Lalthazuala, Chanmari West chu first singles-ah inlanin Alvir Aman, Assam chu deciding game-ah a hneh a. Doubles-ah Mizoramin Sainunmawia Sailo, Ramhlun Venglai leh C. Lalramsanga, Durtlang ten Assam tana inlan, Shubhankar Dutta leh Animesh Gogoi te chu harsatna nei lovin straight set-in an hneh a, reversed singles khelh a ngaih lovin nomawi an la.

Pahnih dangah final

Mizoram aiawha feh chhuakte hian category dang pahnih - Girls’ Team leh Men’s Team Championship-ah final an lut ve ve a, an champion zo lo ve ve thung a, silver medal an la.

Girls’ Team Championship-ah hian first round-ah Tripura hnehin semifinal-ah Manipur an hneh leh a. Final-ah Assam hmachhawnin first singles-ah Lalrinkimi a tlawm hnuah doubles-ah Lalrempuii leh Zoramthari Renthlei te tang dun an tlawm zui leh a, 2-0-in an chak ta lo.

Category ngaihhlut hlawh ber, Men’s Team Championship-ah Mizoram hian first round-ah Nagaland hnehin semifinal-ah tournament thlengtu, Assam hmachhawnin 3-2-in an hneh leh a, NE Zone Inter-state Badminton Championship Men’s Team inelnaa Assam an hneh vawi khatna a ni nghe nghe.

Final-ah Arunachal Pradesh nen intumin first singles-ah Saitluangpuia Sailo-in Nikhil Chetry chu deciding-ah a hneh nghal a. Second singles-ah Laa Talar nena inhmachhawn, Thazuala chu hliam vangin a inhnukdawk, 1-1 a ni.

First doubles-ah C. Lalramzauva leh Joseph VL Ringngheta ten tumpui Nikhil Chetry leh Samuel Tamang te chu straight set-a hnehin Mizoramin 2-1-in hma an hruai a, reversed singles-ah C. Lalramsanga chu Samuel Tamang lakah tlawmin 2-2 a ni leh a. Reversed doubles-ah Sainunmawia Sailo leh Ramsanga te tangdun chu Talar leh Laa Tukum te tangdun lakah deciding game-a tlawmin 3-2-in Arunachal Pradesh chu an champion ta a ni.

Mizoram tan rahbi thar

Badminton Association of India (BAI) hnuaiah India hi zone paruk - North, North East, South, East, West leh Central Zone-ah then a ni a, zone tinah inelna neih niin category tina champion-ten national championship-a team event-ah inelna an hmachhawn thei thin a. Mizoram Junior Boy’s Team-in North East ai an awh thei tur hi Mizoram tan rahbi thar a ni.

Inter-State Badminton Championship hian ngaihhlut a hlawh a, state tinin an player tha ber ber an khelhtir thin a. NE Zone-ah hian Assam an hneh thei ngai lo bawk a, kuminah erawh an khumna an nei ve ta bawk.

Mizoram Badminton Association (MBA) chuan Mizoram aiawha player leh official thawkchhuak zawng zawngte a chhuangin an hlawhtlinnaah lawmpuina a hlan a. Mizoram leh India tihmingthatu ni zui zel thei turin player-te duhsakna a hlan a. An thawhpui - TATA Trusts te, NEIDA te, Mizoram State Sports Council (MSSC) bakah sponsor-tute chungah lawmthu an sawi bawk.