Aizawl: Hmarchhak biala hmasawnna sum pechhuaktu lian ber North Eastern Council (NEC) chuan an hnuaia state hrang hranga hnathawh a chhiat em avangin kum 2017 atanga hmasawnna atana sum pekchhuah tawh zawng zawng chu hmang rih lo turin northeast state zawng zawng a hrek a, hetih lai hian Ministry of DoNER chuan hmasawnna hnathawh tur ngaih pawimawh bik, state priority list an thehluh thin chu a thiat tih state sorkar te a hriattir bawk. NEC chuan April 1, 2018 atanga NEC hnuaia hmasawnna sum pekchhuah zawng zawng chu a hrek tih thuchhuah siamin an tarlang a. Hetah hian hmasawnna sum state hnena pekchhuah chu tihtawp rih a nih thu leh pekchhuah tawh a awm a nih pawhin state te chu an sum dawn tawh chu department te hnenah khawih che lo tur leh hmang hrih lo turin a hriattir bawk a ni. Thulaknain a tarlan danin state hrang hrangten NEC sum hmanga an hnathawh a thatloh vangin sum hi hrek a ni bawk a ni. Hetih rual hian Ministry of DoNER chuan  DoNER Secretary, NEC Secretary leh state tin Chief Secretary te telna tur Project Identification Committee-in hmasawnna sum pekchhuah tura ngaih pawimawh hmasak turte chu a thlan tawh dawn avangin state ten anmahni ngaih pawimawh hmasak State Priority List an siam thin chu a thiat tih thuchhuah siamin an tarlang bawk. Kum 2018-19 bikah hian Mizoram tan NEC hnuaiah hian Rs. nuai 437.18 sanction a ni a. North East state zawng zawng tana sum sanction hi Rs nuai 6607.19 a ni.