ZALEN July 17, 2026 : India-a damdawi lam zir tur thlanna, National Eligibility cum Entrance Test (NEET-UG) 2026 result chu nizan khan tihchhuah a ni a. Mizoram atangin zirlai mi 1,353 an inziak tling, H. Malsawmdawngzuala Aizawl Khatla Venga cheng chuan 99.40602 percentile hmuhin Mizoram topper a ni.

NEET (UG) 2026-ah hian Mizoram atangin zirlai 2,624 an inziak lut a, an zinga mi 2,166-in exam an hmachhawn. Hemi zirlai exam hmachhawntu zingah hian mi 1,353-in exam an tling a ni.

Mizoram topper H. Malsawmdawngzuala hian India ram pum huapah All India Rank (AIR) 11,875 a chang a. Chu bakah, Mizoram Quota-a Technical Course hrang hrang zir tur thlanna SMATEE 2026-ah pawh Mizoram pumah pakhatna a chang bawk a ni.