ZALEN, August 27, 2026: Nilaini chhuna Nepal leh Tibet ramria sabereka khuangkaih nasa tak thlengah Mizoram atanga missionary-a kal zingah a tuar ve an awm hriat a la ni lo.

ZALEN-in Synod Mission Board (SMB) Secretary Rev Hmingsanga hnen atanga thu a dawn danin tun thlengin an missionary zinga chhiatna thleng tuar an awm an hre rih lo va, an la inchhui zel mek zel thung.

SMB hian India ram chhung leh pawnah mission field 18 neiin heng zingah Nepal Mission Field pawh a tel a. Nepal-ah hian Mizo thawktu 33 leh Nepal mi 56 an awm a, Mizoram atanga chanchin tha hril hna thawka rawngbawltu tir tam ber an ni tih Rev. Hmingsanga chuan a sawi.

ZALEN-in a hriat theih chinah missionary tirtu kohhran dangah pawh chhiatna tuar an awm rih lo.

Misssionary-ten an tawrh hriat a la nih loh laiin Mizoram sorkar chuan veng/khaw hrang hrangah hriattirna tichhuakin mahni veng/khua mi leh sa, Nepal-a zin emaw, awm emaw an awm chuan tual chhung thuneitute hnena hriattir turin ngenna a tichhuak.

Nepal-a chhiatna thlengah hian he chanchin ziah lai thleng hian mi 177 vel thi an awm tawh a, Indian za teltelin mi sang dawn chin hriat loh an la ni bawk a, chhanchhuah leh mi zawn hna thawh mek zel a ni.