Aizawl: Junior Research Fellowship leh Assistant Professor ni tura paltlang ngai University Grants Commission (UGC) National Eligibility Test (NET) kalphung chu tih danglam a ni. Central Board Of Secondary Education tarlan danin UGC NET-ah hian tihdanglam a awm nual a. He exam bei turte tan hian Aadhaar nei ngei ngei a ngai tawh dawn a, NET tling tura mark hmuh ngai chu 40% niin reserve category tan 35% a ni bawk. Hemi a nih chuan exam beitute hian paper 3 exam turah a vaiin mark 140 an hmuh a ngai dawn a, reserve category te erawh chuan mark 123 an hmuh a ngai dawn a ni. UGC NET kalphung thara NET qualify turah mark hmuh ngai zat tihtlem chu tha a tih thu sawiin Mizoram University Vice Chancellor ni mek Prof Lianzela chuan NET la clear lo tam tak an awm tih a sawi a, heng mite hmakhua atana tha a tih thu a sawi. Prof Lianzela chuan NET qualify an tam theih chu tha a tih thu sawiin, “Mi thenkhat chuan quality a tih hniam an hlau maithei a, mahse kei chuan quality tehna a ni lo ka ti a, NET qualify an tam theih hi a tha a ni,” tiin a sawi bawk. NET ah hian exam beitu zawng zawng atanga chhutin zaa 6 te tihtlin an ni dawn a. Hei bakah hian Junior Research Fellowship hmu zat chhutna formula thar siam a ni bawk. CBSE hian exam fee tipungin General tan Rs 1000, OBC tan Rs 500, SC/ST/PwD tan Rs 250 a ni tawh dawn a ni. Thudawn danin exam beitute hi exam hall-ah pen pek vek an ni tawh dawn bawk. Hetih lai hian kalphung thlak loh, a ngai anga kalpui turte a awm bawk a. Zawhna zawng zawng hi objective type a la ni zel ang a, negative mark a awm lo bawk ang. Exam timing tihdanglam a awm lo va, syllabus thlak a ni lo bawk a ni.