July 13, 2022; National Health Mission Employees Union Mizoram (NEUM) chuan sawrkar a phut an neih hrang hrangah an lungawina khawp an la hmuh loh avangin, tiamchin awm lo in mass casual leave an la chhunzawm dawn.

Vawiin a thuchhuah an siamah NEUM chuan an harsatna hrang hrangte chinfel a nih theih nan sawrkar hotute hnenah ngenna vawi tam tak an thlen tawh tih tarlangin, mass casual leave lak chungchangah Hon`ble Deputy CM hovin, 12.7.2022 khan meeting an neih thu te an tarlang a, meeting minute vawiin a chhuakah, phut an neih hrang hrang atana an lungawina khawp an hmuh loh avangin mass casual leave an lak chu zo tawh mahse, NEUM meeting vawiin a thukhawm chuan 'Indefinite Strike' neih chhunzawm nise tiin an rel a ni. 

Mass casual leave leh strike an neih avanga mipuiten hriselna kawnga harsatna an tawh palh theih chungchangah hriatthiamna an ngen tak meuh meuh tih an thuchhuah ah chuan an tarlang bawk.

• NEUM thuchhuah tarlan dan:
• Thil ngiat hamthatna hrang hrang an neih zirchiangtu tur study group din a hma laksak sawrkarin a tiam vangin, July ni 13-15, 2021 a nawrh an tum chu an lo thulh tawh.
• Study Group report cabinet meeting a pharh turin a awm an ti a, April 2022 ah peih fel tawh angin hriattir an ni. Vawi hnih vawi thum cabinet meeting an neih hnu-ah pawh ngaihtuah a ni lo.
• Jan-March, 2022 kha april thla thar vel ah an la a. April - June thla hlawh erawh mass casual leave lak sawi rik a nih khan June ni 8, 2022 ah, thla hnih atan (April – May Salary) siamsak an ni.
• Supreme Court order No. F. COVID-19/60/2020 –ME(Pt. I) Dt.18th June, 2020 tih chhuahah chuan an hlawh a hun tak a pek loh hi dan kalh a ni tiin order chhuah a awm.
• Mizoram Essential Service Maintenance Act, 1990 (MESMA) July 8, 2022 ah sawrkarin a puan hnan.