Aizawl: New market a sumdawng pawl hrang hrang te chuan Mizoram sawrkarin an awmna building sa mai tura a tih laia vawiin ni thlenga a la sak loh avanga an mangan thu an sawi. Pawisa a awm tih sawi reng chunga kan awmna tur sak a la ni lo hi sumdawngte rahbehna ah kan ngai a, kan ngaithiam thei lo, an ti

Vawiin khan New Market Joint Sumdawng Association te chuan Press mite sawmin an harsatna hi an sawipui a. New Market Joint Sumdawng Association President R.Lalthangzama chuan, "Pawisa a awm tih sawi reng chunga kan awmna tur sak a la ni lo hi sumdawngte rahbehna ah kan ngai a, kan ngaithiam thei lo a ni," a ti. New market tender chungchang sawiin New Market Joint Sumdawng Association President chuan, "January thla khan market building sakna atan hian tender chhuah anih dawn thu sawrkar lam chuan an sawi a, mahse an chhuah lo a. UD&PA changtu Deputy Chief Minister chuan March thlaa session ah kum thara tender tur anga a sawi chungin vawiin thlengin tender a la ni lo a. Heti ngawta sawrkarin min namnul hi na kan ti hle a ni," a ti bawk.

R.Lalthangzama chuan kum 2 chuang eizawnna an neih loh avangin New market a eizawng thin te chu an harsa tawh hle nia sawi bawkin, "Vairama lehkha zirtir thin te pawhin an koh haw a ngai tawh a. Dinhmun harsa takah kan awm a, kan rum tak meuh a ni," a ti bawk. Zawhna chhangin New Market Joint Sumdawng Association hruaitute chuan sawrkarin an awmna tura a ruahman te chu a hmun a tet bakah a him loh avangin an tan awmna chi a ni lo niin an sawi bawk.

New Market Joint Sumdawng Association hruaitute chuan New market thiah takah khan eibel bera hmangtu chhungkua 1228 an awm niin an sawi.

New Market hi mihring tan a him lo nia hriain July 2020 khan thiah a ni a. UD&PA hnuaiah Aizawl City Centre tih hming vuaha Smart City Ltd. hnuaiah sak tum a ni.