Ruahpui vanawn surin tui a tihlen nasat em avangin United States-a New York City-ah emergency puan hial a ni.

Lei hnuai rel (subway system), kawtthler leh kawngpui tam tak tuiin a chim a; LaGuardia Airport-a terminal pakhat chu Zirtawpni khan khar a ni bawk.

Khawpui hmun thenkhatah chuan ruah hi cm 20 zet a sur a, hmun thenkhatah la sur belh tur anga sawi lawk a ni bawk.

“A hlauhawm a, nunna tiderthawng thei a ni,” tiin Governor Kathy Hochul chuan a sawi.

“New York City, Long Island leh Hudson Valley-ah ruah a sur tam lutuk avangin emergency ka puang a ni,” tiin Gov Hochul hian X-ah a tar lang.

Mipuite chu hmun hima awm hram tur leh tuiin a chim kawngpui zawha tei chhuak lo turin a ngen bawk.

Ruah sur leh tui lianah hian thi emaw, hliam na tuar emaw erawh an awm hriat a la ni lo.

Emergency hi New Jersey-a Hoboken khua, New York City atanga Hudson River kâna a pawh chiahah pawh puan a ni.

New York City Mayor Eric Adams chuan emergency puan lai chu mipuite tan ‘inralrin lehzual hun lai’ a nih thu a sawi.

“Kan subways thenkhatte tuiin a chim a, khawpui chhung kal vel a harsat lai a ni,” tiin thuthar lakhawmtute hnenah a sawi.

Zirtawpni tlai (India-a Inrinni tuk) khan car-a tang mi 15 leh in hnuaia tang mi pathum an chhanchhuah thu a sawi bawk.

Khawpui hmar lam dai, Mamaroneck, Westchester County-ah pawh emergency thuneituten hampuar theih lawngleng hgmangin ina tang mi eng emaw zat an chhan chhuak bawk tih Reuters-in a tar lang.

# New York-a Chief Climate Officer Rohit Aggarwala chuan khawpuia bawlhhlawh luan chhuahna chuan darkar khatah tui inches 1.75 chauh dawl thei tura duan a nih laiin Brooklyn Navy Yard-ah ringawt pawh ruah hi darkar khatah inches 2.5 chuang a sur niin a sawi a. “Brooklyn hmun thenkhatin hetiang hnawm leh tui lian an tawng hi a mak lem lo a ni,” a ti.

# South Williamsburg, Brooklyn-ah chuan thawktuten khup thleng thleng tui dai chungin tui luan kawr hnawhtu tifai turin an thawk chhuak.

# Subway system leh Metro North commuter rail service chu a mumal lo vek tih Metropolitan Transportation Agency chuan a sawi a. Subway line thenkhat phei chu a vaia chawlhtir niin station thenkhat khar nual a ni bawk.

# La Guardia Airport-a Terminal A chu tui lian vang hian khar a ni tih thuneituten an sawi a. Passenger-te chu an zin chhuah hmain an airline nen inbepawp hmasa zel turin an hriattir.

# New York Police Department pawhin kawngpui tam tak khar a ni tih an puang a, National Guard duty-tir an ni a. Hetih lai hian Manhattan khawchhak lama kawngpui ber, FDR Drive-ah chuan car chim pil deuhthawa tui a tam avangin lirthei a che thei lo va, an ding thup bawk.