Paris Saint-Germain star Neymar chu tun nipui transfer inhawn hunah Newcastle lamin lei chhuah an tum dawn niin Spain chanchinbu te chuan an ziak. Brazilian forward leh Lionel Messi te hian PSG lamah lawm an hlawh teh chiam lo va. Ligue 1-ah French club lian PSG hian 3-0 a Bordeaux an hneh tum pawhin an pahnih hian fans lam chuan an au el bakah an boo khum. Champions League lama Real Madrid laka an tlawm vang khan fans ho hi an la lungawi thei lo a nih hmel. 

Fichajes chuan, tun nipui hi khawvel-a player tha ber pakhat Neymar Premier League lama khel tura lei chhuahna hun remchang ber a nih thu a sawi. Kum 30 mi Neymar hi tunah khawvel player manto ber niin Paris lama kal tur hian 2017 August thla khan £198million an seng a ni. PSG lamah hian a khel chhe hran lo va, competition hrang hrangah game 136 khel tawhin goal 92 a thun tawh a ni. 

A kum telin goal thun kawngah pawh a tlahniam ve telh telh a, tun season hian goal 5 chiah a la thun. Amah mai bakah PSG lama a khelh pui pahnih Messi leh Mbappe te nen an inkawp chu beiseina sang tak nen an thlir a,'dream front three' an tih hial star pathum te hi an la inkawp rem hleithei lo. An inman tak tak hmain an awmna club hi an chhuahsan vek mai ang tih pawh hlauhawmin tunah hian rimtu an nei theuh bawk.