Transfer thu thar berah chuan Brazilian star Neymar Jr. chuan tun nipui hian Paris Saint-Germain a chhuahsan maithei tih a ni. French club lam hian Neymar hralh hi an hnial lutuk lo niin an sawi bawk.

Kum 2017 khan Parisian lam hian €222 million zetin Barcelona atangin an lei chhuak a, tun thlengin Neymar aia manto an la awm leh lo.  

Kum 30 a upa Brazilian footballer hian PSG lamah hian season nga chhung chu hun hmang ve tawhin trophy pawh 11 lai a chawi ve tawh. Ligue 1 champion tan hian match 144 khel tawhin goal 100 thunin assist 60 a nei a, record chhia a ni hauh lo. 

A inhliam fo thin vang leh a fit tawk lo a ngai fans zingah an tam a, lawm a hlawh lo. A man to viau mahse duh an awm a nih phawt chu Paris Saint-Germain lam hian €50 million aia hniam pawha hralh an hnial lo niin El Chiringuito TV chuan a sawi. Hetiang thawm a rik takah chuan Neymar Jr. a pan thei club an inrin siak leh tan tawh a, chung te chu:

#5 Newcastle United
Premier League club hi club ropuia sawi nilo mah se Saudi Arabian pa hausa-in a lei tak hnu hian, Neymar-a te ang hlawh tam kawl thei European club tlem te zing ami an ni tawh. Neymar hian thla tin £3.4 million (Cheng 326,400,000) lawih a hlawh. 

Sum lama phang lo Newcastle United hian Neymar-a hi zawrh lai a ni tih an hre tawh a, St. James' Park stadium mawi tura lei chhuah an tum ngeiin a rinawm. 

#4 Barcelona
A khelh thinna club Barcelona lam hi player tha zawng mek an ni a, Camp Nou lama kir lehna hun tha hi an siam thei maithei bawk. Brazilian forward hi Barca lamah 2013-2017 inkar khan season li chhung alo khel tawh a, a khelhpui ten an zir bawk nen ropui takin a khel a ni. Barca-ah hian game 186 khel hmanin goal 105 a thun a, assist 76 a nei bawk. 

Barcelona-a a khelh lai 2014-15 season khan goal 39 thunin Spanish club hi treble champion a ni pui thei a, hemi tum hi a season hman that ber tum pawh a ni awm e.

#3 Juventus
PSG forward lei tur zingah hian Italian club hlun Juventus pawh hi chhiar hmaih chi an ni lovang. Bianconeri hian 2018-a Real Madrid atanga Cristiano Ronaldo an lak hnu khan transfer lian tham an la nei leh lo. Ronaldo lah a chhuak leh ta daih bawk nen Juventus hian Ronaldo hmunruak hnawhkhat tur player huhang nei tham an la lalut leh lo a ni. 

Kum hnih chhung league title chawi tawh lo hian an dinhmun siam tha thei khawpa player tha chu an mamawh tih an hre ve ngeiin a rinawm. Spain leh France lama khel tawh Neymar pawh hian Italy lama khelh hi a hnial lo maithei bawk. 

#2 Manchester United
European club lian zinga boruak lian ve tak United pawh boruak maia an thamral lohna turin player tha lak belh an mamawh tih an coach thar hian a hria a, player tha a melh mek. Neymar hi zawrh lai a ni tih an hriat chuan an mit la tur zing ami chu a ni ve ngei ang. 

Red Devils hi football khawvel-a team lian pawl an nih ve avangin Old Trafford lama kal tura an duh chu an hlah lo tih tichiang turin 2021 khan Ronaldo pawh an thur chhuah nalh kha. 

Neymar hi sawm chhuah a nawmna tur pakhat chu Ronaldo nen an thawk dun thei dawn a ni. Sumdawnna lam mit atanga thlir pawhin PSG star hi Manchester United tan sum hmuhna tha tak a nih dawn vangin an lalut hreh lo maithei.

#1 Chelsea
Tun nipui chhunga Brazilian lalut thei tur zingah chuan neitu thar nei Chelsea hi an chhiar tel theih ang. Club neitu thar hian a season hmasa berah hian transfer thawm nei hat khawp neih a duh ngeiin a rinawm. 

Neymar leh tuna Blues manager Thomas Tuchel te hi PSG lama kum hnih chhung thawk dun tawh a nih vangin Stamford Bridge lama Brazilian star sawm luh hi Tuchel-a tan pawh thil har a ni lo maithei. 

Brazilian hian season hnih chhung German tactician hnuaiah hian khel tawhin  goal 41 zet a khung tawh a, assist 34 a nei bawk.