Lionel Messi-a’n nipuia a contract neih lai a tawp rualin Paris Saint-Germain a chhuahsan dawn tih a chiang tawh a. Barcelona atanga a lo kawppui tawh, Neymar Jr hming a ri nghal a, Paris khawpuia thil thleng tharte avangin a zui chhuak duh mai ang em tih rinna a lian mek.

Brazil captain hi Manchester United nen pawh sawi zawm zui nghal zat a ni a; mahse, engmah chiang a la awm lo.

PSG tantute chuan an chet danah Neymar-a hi Argentina captain ruala nawr chhuah an tum tih a chiang fu a, Nilaini zanah khan a in tualah pung khawmin chhuak turin an ti.

Fan-te hi club hmunpui, Boulogne-Billancourt-ah thahnem tawk tak pungkhawmin player thenkhat leh coach Christophe Galtier-a laka an lungawi lohna an lantir a. Hei hi duhtawk lovin mi thenkhat chu Neymar-a chenna in tualah pung khawm koh chhuah an tum a, hla sain club chhuahsan turin an ti a, “Neymar, break up!” tiin an zai khum.

PSG fan-te hian an duh ang a hlawhtlin hma loh chuan ‘zan tin hetianga tih zel an tum’ tih an sawi a. Hei vang hian club chuan Ningani khan an training centre, Camp des loges-a mi bakah player pathum - Messi, Neymar leh Marco Veratti te chenna in chu venhimna awm sa bakah pek belh turin an ti hial.

Club-in thuchhuah a siamah chuan ‘mi thenkhatin hetianga chet an thawh hi an dem tak zet’ tih an sawi.

Neymar-a bik hi February 19 atang tawh khan hliam avangin a la inkhel leh miah lo va; mahse, Parisian-te hian an dim chuang lo va, Pathianni zana Parc des Princes khelmuala Lorient laka 1-3 a an tlawmnaah mawh an phurhtir ve tho.

Brazilian striker hian Ningani khan Instagram-a account-ah amah duh lotute chhanna ni ngei tur a pho chhuak zui ve a, “Mipuite buaina chu nangmahah luhtir lo la, i muannaah la lut zawk ang che,” a ti.

Hei bakah hian Brazilian site pakhat, TNT Sports-in an Twitter account-a an thil dah chhuah, Barcelona tana kum 2013 leh 2017 inkara an khelh dun lai khan tun aiin an hlim dun zawk tih lam hawi chu a ‘like’ bawk.

Hetiang thil neuh neuh a thlen avang hian kum 31 mi, Neymar-a hian a thianpa a zui chhuak ve nghal duh mai dawn em tih zawhna a awm mek a. Kum 2017-a a zawm hnua vawi 112 khelha goal 82 a lo thunsak tawh, Paris club-ah hian kum 2025 nipui thleng hun a la nei.