ZALEN September 29, 2024 : Food, Civil Supplies & Consumer Affairs (FCS&CA) Minister B.Lalchhanzova chuan National Food Security Act (NFSA) hnuaia hamthatna dawng tur thlan chungchangah ngaihtuahna thar sen mek a ni tih a sawi.

FCS&CA minister sawi danin tun dinhmunah kum 2011 chhiarpui angin NFSA hnuaia hamthatna dawng thei tur hi chhut a ni tih a sawi a. Mizoram quota hi tipung turin sawrkar laipui pawh a nawr niin a sawi.

Minister chuan NFSA dawng tur hian urban I (district capital)-a khawsa, kum khata nuai 5 la lut tling lo te, urban II (sub town)-a khawsa kum khata nuai 3.5 la lut tling lo leh thingtlanga khawsa kum khata nuai 2.5 lalut tling lote chu NFSA hamthatna dawng thei tur hian ngaihtuahna sen mek a ni tih a sawi.

Thudawn danin Mizoramah mi 7,06,296-te chuan NFSA hamthatna hi an dawng thei a, heng zinga chhungkua 26,100 chu AAY niin leh card pawl (priority house hold)-a mihring awm zatin 7,06,296 a pel thiang lo a ni.

FCS&CA minister chuan October, 2024 atanga retailer-ten buhfai an hralhna atanga an hlep chu duli (.50) atangin Rs. 1.50-ah tihsan a ni dawn tih sawi bawkin, “Retailer-te lawmman tihsan vang hian kum khata sum sen belh tur hi vaibelchhe 17 vel ni turah kan chhut a, a hma khan vaibelchhe 6 vel kan seng a. Mahse, buhfai carry over atangin kum khatah vaibelchhe 25 vel hum kan beisei a ni,” a ti a. March atanga August, 2024 chhung khan carry over atang hian buhfai quintal 15,000 vel an hum niin a sawi bawk.

• Mizoramah ration card nei chhungkaw 2,87,932 an awm mek a, ration card-a mihring awm zat chu 11,69,048 an ni.

• Card eng AAY 25,861, card pawl (PHH) 1,50,532 leh card var 1,11,539 a awm a. AAY-ah mihring 64,123, PHH-ah 6,40,992 leh Non NFSA (card var)-ah mihring 4,69,765 an awm.

• Ration lakna atan ni lo, document pawimawha hman tur, Not Entitled for Ration (NER) card nei mi 14 awmin mihring 31 an awm mek.

• AAY-ten thla khatah a thlawnin buhfai 35kgs an dawng thei a. PHH-ah mi pakhatin a thlawnin 5kgs an dawng thei a, mi pakhat tan zel 3kgs chu Rs. 15-in an khul thei bawk.

• October, 2024 atangin card var neiten buhfai kg-ah Rs. 30-in an khul a ngai tawh dawn.

• Retailer lawmman chu October atangin kg khat zelah duli atangin Rs. 1.50-ah tihpun a ni.

• NFSA hnuaia hamthatna hi March 1, 2016 atangin Mizoramah hman tan a ni.

• Adhaar leh ration card thlunzawmah Mizoram chu India rama a titha ber niin 100% thlunzawm a ni.